‘మీర్జాపూర్‌’లోకి సోనాల్‌ చౌహాన్‌

‘లెజెండ్‌’, ‘పండగ చేస్కో’, ‘సైజ్‌ జీరో’ లాంటి సినిమాలతో తెలుగు ప్రేక్షకులకు చేరువైంది సోనాల్‌ చౌహాన్‌. తాజాగా ఆమె ‘మీర్జాపూర్‌: ది ఫిల్మ్‌’ చిత్రంలో భాగమైనట్లు సామాజిక మాధ్యమాల వేదికగా ప్రకటించింది చిత్రబృందం. ‘‘అద్భుతమైన ఆటను మార్చే ప్రయాణంలో భాగం కావడం చాలా సంతోషంగా ఉంది. ‘మీర్జాపూర్‌: ది ఫిల్మ్‌’లో చేరడానికి చాలా ఉత్సాహంగా ఉన్నాను. నన్ను మీర్జాపూర్‌ ప్రపంచంలోకి తీసుకువచ్చినందుకు దర్శకుడికి, నిర్మాతలకి ధన్యవాదాలు’’ అనే వ్యాఖ్యని జోడించింది సోనాల్‌. గుర్మీత్‌ సింగ్‌ దర్శకత్వంలో ఫర్హాన్‌ అక్తర్, రితేశ్‌ సిధ్వానీ ఈ చిత్రాన్ని నిర్మిస్తున్నారు. పంకజ్‌ త్రిపాఠి, అలీ ఫజల్, దివ్యేందు, శ్వేతా త్రిపాఠి నటించిన మీర్జాపూర్‌ ఫ్రాంచైజీ మూడు సీజన్లలో చాలామంది అభిమానుల్ని సంపాదించుకుంది. దర్శకుడు గుర్మీత్‌ సింగ్‌ ఇప్పుడీ హిట్‌ వెబ్‌సిరీస్‌ని సినిమాగా రూపొందిస్తున్నాడు. ఈ సినిమాలో పాత తారాగణంతో పాటు కొత్తగా జితేంద్ర కుమార్, రవి కిషన్‌ కీలక పాత్రలు పోషిస్తున్నారు. మీర్జాపూర్‌ ప్రాంతంలో అధికార పోరాటాలు, నేరస్థుల అండర్‌ వరల్డ్‌ కథకు కొనసాగింపుగా ఈ సినిమా తీసుకురానున్నట్లు తెలుస్తోంది. క్రైమ్‌ థ్రిల్లర్‌గా తెరకెక్కుతున్న ఈ చిత్రం వచ్చే ఏడాది విడుదల కానుంది.