Mohan Babu: మోహన్‌బాబు అలా ‘అల్లుడుగారు’ అయ్యారు.. అదరగొట్టారు

ఇంటర్నెట్‌ డెస్క్‌: కొన్ని సినిమాల్లోని పాత్రలు ప్రేక్షకుల హృదయాల్లో ప్రత్యేక స్థానాన్ని సొంతం చేసుకుంటాయి. ఇలాంటి వాటిలో ప్రముఖ హీరో మోహన్‌ బాబు (Mohan Babu) పోషించిన విష్ణు పాత్ర ఒకటి. ఈ రోల్‌ ప్లే చేసిన ఆ హిట్‌ చిత్రం మరేదోకాదు ‘అల్లుడుగారు’ (Alludugaru). నేడు మోహన్‌బాబు పుట్టినరోజు సందర్భంగా ఆ సినిమా సంగతులు చూద్దాం..

‘జగదేక వీరుడు అతిలోక సుందరి’ (1990) విజయంతో దర్శకుడు రాఘవేంద్రరావు క్రేజ్‌ రెట్టింపయ్యింది. దీంతో, ఆయన తదుపరి ప్రాజెక్టులపై ప్రేక్షకుల్లో భారీ అంచనాలు నెలకొన్నాయి. దాన్ని దృష్టిలో పెట్టుకుని ఆయన ‘అల్లుడుగారు’ను తెరకెక్కించేందుకు సిద్ధమయ్యారు. ఆ క్రమంలో.. ‘సూపర్‌హిట్ తర్వాత చేస్తున్న చిత్రమిది. అందుకే పెద్ద హీరోని తీసుకోండి. ఎందుకు మోహన్‌బాబుతో తీస్తున్నారు?’ అని రాఘవేంద్రరావుతో కొందరు అన్నారట. వారి మాటలను పట్టించుకోకుండా రాఘవేంద్రరావు తనతో ఆ చిత్రాన్ని తెరకెక్కించారని మోహన్‌బాబు ఓ సందర్భంలో నాటి సంగతులు గుర్తుచేసుకున్నారు. 32 రోజుల్లో చిత్రీకరణ పూర్తయిందని తెలిపారు. శోభన, రమ్యకృష్ణ హీరోయిన్లుగా నటించిన ఈ సినిమా 1990 సెప్టెంబరు 28న విడుదలైంది. ఈ చిత్రం పలు థియేటర్లలో 100 రోజులు పూర్తి చేసుకోవడం విశేషం. ‘ముద్దబంతి నవ్వులో’, ‘కొండమీద చుక్కపోటు’.. ఇలా ఇందులోని పాటలన్నీ ఇప్పటికీ మార్మోగుతూనే ఉన్నాయి.