Mansion 24: హారర్‌ సిరీస్‌.. ‘మాన్షన్‌ 24’

‘రాజు గారి గది’ లాంటి హారర్‌ కామెడీ సినిమాలతో ప్రేక్షకుల్ని ఆకట్టుకున్న దర్శకుడు ఓంకార్‌ ఈ సారి ‘మాన్షన్‌ 24’ అనే సరికొత్త వెబ్‌ సిరీస్‌తో రాబోతున్నారు. అశ్విన్‌ బాబు, కల్యాణ్‌ చక్రవర్తి నిర్మించారు. వరలక్ష్మి శరత్‌కుమార్‌, అవికా గోర్‌, బిందు మాధవి, నందు కీలక పాత్రలు పోషించనున్న ఈ సిరీస్‌ ట్రైలర్‌ విడుదల కార్యక్రమం హైదరాబాద్‌లో జరిగింది. దర్శకుడు అనిల్‌ రావిపూడి అతిథిగా పాల్గొన్నారు. ఈ సందర్భంగా దర్శకుడు ఓంకార్‌ మాట్లాడుతూ...‘ఎంత ఎదిగినా చిన్న సినిమాలకు, సిరీస్‌లకు అతిథిగా వచ్చే అనిల్‌కు కృతజ్ఞతలు. ఇప్పుడు ట్రెండ్‌ మారుతోంది. కొద్ది రోజుల్లోనే ఓటీటీకి ప్రాధాన్యత మరింత పెరిగింది. ఇలాంటి సమయంలోనే ఈ సిరీస్‌ను డిస్నీ ప్లస్‌ హాట్‌ స్టార్‌లో అభిమానులకు అందిస్తున్నందుకు చాలా సంతోషంగా ఉంది. నాకు బలంగా నా తమ్ముళ్లు ఉన్నారు. వారు లేకుంటే నేను ఈ స్టేజ్‌మీద ఉండేవాడిని కాదేమో. ఈ ప్రాజెక్టు కోసం అందరం చాలా కష్టపడ్డాం. ఈ సిరీస్‌లోని ఆరు ఎపిసోడ్స్‌ చాలా ఆసక్తిగా ఉంటాయి’ అన్నారు. ‘ఈ సిరీస్‌ ట్రైలర్‌ చాలా బాగుంది. వరలక్ష్మి నటన అద్భుతంగా ఉంది. ఓంకార్‌ నాకు ‘పటాస్‌’ నుంచి పరిచయం. ఓటీటీలో రానున్న ఈ సిరీస్‌ మంచి హిట్‌ అవ్వాలని కోరుకుంటున్నాను. అన్నదమ్ములు కలిసి ఓ ఫ్యామిలీ ఎంటర్‌టైనర్‌ చేయాలని కోరుకుంటున్నాను’ అన్నారు అనిల్‌ రావిపూడి.