Nagarjuna: శరవేగంగా నా సామిరంగ

సంక్రాంతి బరిలో దిగడమే లక్ష్యంగా ‘నా సామిరంగ’ను పరుగులు పెట్టిస్తున్నారు నాగార్జున. ఆయన కథానాయకుడిగా నటిస్తున్న ఈ చిత్రాన్ని నృత్య దర్శకుడు విజయ్‌ బిన్ని తెరకెక్కిస్తున్న సంగతి తెలిసిందే. ఈ సినిమా చిత్రీకరణ మైసూర్‌లో శరవేగంగా జరుగుతోంది. ఈ షెడ్యూల్‌లో ఇప్పటికే పాటలు చిత్రీకరించగా.. ఇప్పుడు కీలక సన్నివేశాల్ని తెరకెక్కిస్తున్నట్లు తెలుస్తోంది. త్వరలోనే ఈ చిత్రీకరణను పూర్తి చేసి.. పాటలతో ప్రచార కార్యక్రమాలకు శ్రీకారం చుట్టేందుకు సన్నాహాలు చేస్తున్నారు. ఇందుకు తగ్గట్లుగానే నిర్మాణానంతర పనుల్ని పరుగులు పెట్టిస్తున్నట్లు తెలిసింది. పీరియాడిక్‌ మాస్‌ యాక్షన్‌ ఎంటర్‌టైనర్‌గా రూపొందుతోన్న ఈ చిత్రంలో నాగార్జున మునుపెన్నడూ చూడని మాస్‌ లుక్‌లో కనిపించనున్నారు. దీంట్లో ఆషికా రంగనాథ్‌ కథానాయికగా కనిపించనుండగా.. అల్లరి నరేశ్‌, రాజ్‌తరుణ్‌ తదితరులు కీలక పాత్రలు పోషిస్తున్నారు. శ్రీనివాసా చిట్టూరి నిర్మిస్తోన్న ఈ చిత్రానికి ఎం.ఎం.కీరవాణి సంగీత దర్శకుడిగా వ్యవహరిస్తున్నారు.