Varun Tej: ‘మట్కా’ సన్నాహాలు..

వరుణ్‌ తేజ్‌ నటిస్తున్న తొలి పాన్‌ ఇండియా సినిమా ‘మట్కా’. కరుణ కుమార్‌ దర్శకత్వం వహిస్తున్న ఈ చిత్రాన్ని విజేందర్‌ రెడ్డి తీగల, రజనీ తాళ్లూరి నిర్మిస్తున్నారు. మీనాక్షి చౌదరి కథానాయిక. నవీన్‌ చంద్ర, కిశోర్, రవీంద్ర విజయ్‌ తదితరులు ముఖ్య పాత్రలు పోషిస్తున్నారు. చిత్రీకరణ దశలో ఉన్న ఈ సినిమా కొత్త షెడ్యూల్‌ ఈ నెల 19నుంచి ప్రారంభం కానుంది. ఈ విషయాన్ని చిత్ర వర్గాలు శుక్రవారం ప్రకటించాయి. దీనికోసం రామోజీ ఫిల్మ్‌ సిటీలో భారీ సెట్‌ను నిర్మిస్తోంది చిత్ర బృందం. ఆ సెట్‌లోనే వరుణ్‌పై యాక్షన్‌తో పాటు కొన్ని కీలక సన్నివేశాలు చిత్రీకరించనున్నారు. 1958-1982 మధ్య కాలంలో దేశాన్ని తీవ్రంగా ప్రభావితం చేసిన ఒక వాస్తవ సంఘటనను ఆధారం చేసుకొని అల్లుకున్న కథ ఇది. వైజాగ్‌ నేపథ్యంగా సాగే ఈ పీరియాడిక్‌ యాక్షన్‌ థ్రిల్లర్‌లో వరుణ్‌ నాలుగు భిన్న గెటప్పుల్లో కనిపించనున్నారు. ఇప్పటికే సగ భాగానికి పైగా చిత్రీకరణ పూర్తి చేసుకున్న ఈ సినిమా ఈ ఏడాదిలోనే ప్రేక్షకుల ముందుకు రానున్నట్లు తెలుస్తోంది. ఈ చిత్రానికి జి.వి.ప్రకాష్‌ కుమార్‌ సంగీతమందిస్తున్నారు. ఎ.కిశోర్‌ కుమార్‌ ఛాయాగ్రాహకుడిగా వ్యవహరిస్తున్నారు.