AP News: పంచాయతీ ఎన్నికల పోలింగ్‌.. అక్రమాలకు తెరతీసిన వైకాపా!

అమరావతి: ఏపీలో 35 సర్పంచ్, 245 వార్డు సభ్యుల స్థానాలకు ఇవాళ పోలింగ్‌ జరుగుతోంది. ఈక్రమంలో పలుచోట్ల వైకాపా అక్రమాలకు తెరలేపింది. ఏలూరు జిల్లా దెందులూరు నియోజకవర్గం పెదపాడు మండలం వీరమ్మకుంట పంచాయతీ ఎన్నికల్లో ఉద్రికత్త నెలకొంది. వైకాపా కార్యకర్తలు.. తెదేపా కార్యకర్తలపై దాడికి పాల్పడ్డారు. వైకాపా ఎమ్మెల్యే అబ్బయ్య చౌదరి దగ్గరుండి మరీ తమపై దాడులు చేయిస్తున్నారని తెలుగు దేశం కార్యకర్తలు ఆరోపిస్తున్నారు. మరోవైపు మాజీ ఎమ్మెల్యే, తెదేపా నేత చింతమనేని ప్రభాకర్‌ను గ్రామంలోకి రాకుండా పోలీసులు అడ్డుకున్నారు.

కైకలూరు నియోజకవర్గం ముదినేపల్లి మండలం వణుదుర్రు పంచాయతీ ఎన్నికల్లోనూ అక్రమాలు జరుగుతున్నాయని తెదేపా నేతలు మండిపడ్డారు. వైకాపా ఎమ్మెల్యే దూలం నాగేశ్వరరావు కుమారుడు ఆధ్వర్యంలో రిగ్గింగ్ జరుగుతోందని తెలుగుదేశం నేతలు ఆరోపించారు. కాగా, 34 సర్పంచ్‌, 245 వార్డు సభ్యుల స్థానాలకు మధ్యాహ్నం 1 గంట వరకు పోలింగ్‌ జరగనుంది. అనంతరం 2 గంటల నుంచి ఓట్లు లెక్కించి విజేతలను ప్రకటిస్తారు.

పాకాల సర్పంచి ఉపఎన్నికలో ఉద్రిక్తత

ప్రకాశం జిల్లా సింగరాయకొండ మండలం పాకాల సర్పంచి ఉపఎన్నికలో ఉద్రిక్తత చోటు చేసుకుంది. ఏడుగురు తెదేపా కార్యకర్తలను పోలీసులు అదుపులోకి తీసుకున్నారు. కొండపి ఎమ్మెల్యే స్వామి ఇంటి వద్ద పోలీసు బందోబస్తు ఏర్పాటు చేశారు. వైకాపా ఇన్‌ఛార్జిని వదిలి తమను అడ్డుకుంటున్నారని ఎమ్మెల్యే స్వామి ఆరోపించారు.

బొప్పడంలో తెదేపా, వైకాపా వర్గాల ఘర్షణ

శ్రీకాకుళం జిల్లా సరుబుజ్జిలి మండలం బొప్పడంలో వైకాపా, తెదేపా వర్గాల మధ్య ఘర్షణ చోటు చేసుకుంది. పలువురు తెదేపా కార్యకర్తలకు గాయాలు కాగా ఆసుపత్రికి తరలించారు.