Gangula Kamalakar: ఈటలకు దమ్ముంటే గజ్వేల్‌లో మాత్రమే పోటీ చేయాలి: గంగుల

కరీంనగర్‌: భాజపా నేత ఈటల రాజేందర్‌కు దమ్ముంటే ఒక్క గజ్వేల్‌ నుంచి మాత్రమే పోటీ చేయాలని మంత్రి గంగుల కమలాకర్ సవాల్ విసిరారు. అసెంబ్లీ ఎన్నికల్లో రెండు చోట్ల పోటీ చేస్తానన్న ఎమ్మెల్యే ఈటల వ్యాఖ్యలపై.. కరీంనగర్ జిల్లా చింతకుంటలో మంత్రి ఘాటుగా స్పందించారు. హుజురాబాద్‌లో కూడా ఈటల బరిలోకి నిలుస్తున్నారంటే ఆయన భయపడ్డారా?అని ఎద్దేవా చేశారు. భాజపాకు తెలంగాణలో గుండు సున్నా వస్తుందని, ఆ భయంతోనే ఈటల రెండు చోట్ల పోటీ చేస్తానని అంటున్నారని విమర్శించారు. 

మరోవైపు, ఏపీ నేతలైన వైఎస్ షర్మిల, కేఏ పాల్, కేవీపీ రామచందర్ రావు, కిరణ్ కుమార్ రెడ్డిలకు తెలంగాణలో ఏం పని అంటూ గంగుల ప్రశ్నించారు. వారిని అసలే నమ్మొద్దని భాజపా ముసుగులో వచ్చి తెలంగాణను తిరిగి ఆంధ్రాలో కలపాలని కుట్రపన్నుతున్నారని ఆరోపించారు.