RK Roja: తెదేపాను వీడినప్పటి నుంచి కక్ష కట్టారు: మంత్రి రోజా

తిరుపతి (గ్రామీణ), న్యూస్‌టుడే: పార్టీని వీడినప్పటి నుంచి నా జీవితాన్ని సర్వనాశనం చేయడానికి తెదేపా కంకణం కట్టుకుందని మంత్రి రోజా ఆవేదన వ్యక్తం చేశారు. తెదేపా నాయకుడు బండారు సత్యనారాయణమూర్తి చేసిన వ్యాఖ్యలను ఖండిస్తూ మంగళవారం తిరుపతి గ్రామీణ మండలం చిగురువాడ సమీపంలోని తన నివాసంలో ఆమె విలేకర్లతో మాట్లాడారు. ‘ఏదైనా మాట్లాడితే సినిమావాళ్లు అంటారు. తెదేపాను స్థాపించిన ఎన్టీఆర్‌ సినిమావారే కదా. నేను తెదేపాలో ఉన్నప్పుడు మంచి నాయకురాలిని. మీ పార్టీలో నచ్చక దండం పెట్టి బయటికి వచ్చేస్తే అశ్లీల చిత్రాల్లో నటించానంటూ వేధిస్తున్నారు. ఎమ్మెల్యేగా ఎన్నికై అసెంబ్లీలో అడుగుపెడితే కడుపుమంటతో సీడీలు చూపించారు. వాటిని ప్రజలకు, విలేకర్లకు ఎందుకు ఇవ్వరు? నా క్యారెక్టర్‌ గురించి జడ్జి చేయడానికి మీరెవరు? నా కుటుంబం కోసం ఎవరి దగ్గరా చేయి చాచకుండా కష్టపడి పనిచేస్తున్నా’నని చెప్పారు.