అగమ్యగోచరంగా భారాస పరిస్థితి: మల్లురవి

ఈనాడు, దిల్లీ: భారాస లక్క ఇల్లు లాంటిదని, ఓటమి మంటల్లో చిక్కుకొని కాలిపోతుండడంతో ఆ పార్టీ నాయకులు బయటపడుతున్నారని దిల్లీలో తెలంగాణ రాష్ట్ర ప్రభుత్వ ప్రత్యేక ప్రతినిధి మల్లురవి అన్నారు. ఆయన ఆదివారం దిల్లీలో తెలంగాణభవన్‌లో విలేకరులతో మాట్లాడారు. భారాస పరిస్థితి ఇప్పుడు అగమ్యగోచరంగా మారిందని, అందుకే తాము అడగకుండానే ఆ పార్టీ నేతలు వచ్చి కాంగ్రెస్‌లో చేరుతున్నారని అభిప్రాయపడ్డారు. భాజపా, భారాస మధ్య రహస్య ఒప్పందం ఉన్నందునే ఎన్నికల షెడ్యూల్‌ విడుదలకు ముందురోజు కవితను అరెస్ట్‌ చేశారని ఆరోపించారు. దిల్లీలో ఏపీభవన్‌ ఆస్తుల విభజన పూర్తయినందున త్వరలో కొత్త తెలంగాణ భవన్‌కు ముఖ్యమంత్రి శంకుస్థాపన చేస్తారని చెప్పారు.