క్వార్టర్స్‌లో భారత్‌

ఉబెర్‌ కప్‌ బ్యాడ్మింటన్‌

చెంగ్‌డూ (చైనా): ప్రతిష్టాత్మక ఉబెర్‌ కప్‌ బ్యాడ్మింటన్‌ టోర్నమెంట్లో భారత్‌ క్వార్టర్‌ఫైనల్‌కు దూసుకెళ్లింది. ఆదివారం గ్రూప్‌-ఏ పోరులో 4-1తో సింగపూర్‌ను ఓడించింది. తొలి సింగిల్స్‌లో అష్మిత చాలిహా 15-21, 18-21తో యె జియా మిన్‌ చేతిలో ఓడిపోయింది. డబుల్స్‌లో ప్రియ-శ్రుతి మిశ్రా జంట 21-15, 21-16తో హెంగ్‌-జిన్‌ యు జియా జోడీని ఓడించి స్కోరు సమం చేసింది. రెండో సింగిల్స్‌లో ఇషా రాణి 21-13, 21-16తో ఇన్సియిరా ఖాన్‌పై గెలవడంతో భారత్‌ ఆధిక్యంలోకి వెళ్లింది. రెండో డబుల్స్‌లో సిమ్రన్‌ సింఘి-రితిక జోడీ 21-8, 21-11తో యీ తింగ్‌-జాన్‌ మిచెలీ జంటపై.. తర్వాత సింగిల్స్‌లో అన్మోల్‌ 21-15, 21-13తో లీ మెగాన్‌పై నెగ్గి ఘనవిజయాన్ని అందించారు. థామస్‌ కప్‌లో భారత్‌ శుభారంభం చేసింది. గ్రూప్‌-సి తొలి పోరులో 4-1తో థాయ్‌లాండ్‌ను ఓడించింది. తొలి సింగిల్స్‌లో ప్రణయ్‌ 20-22, 14-21తో కున్లావత్‌ విదిత్‌సర్న్‌ చేతిలో ఓడినా.. డబుల్స్‌లో సాత్విక్‌ సాయిరాజు-చిరాగ్‌శెట్టి జంట 21-19, 19-21, 21-12తో పీరాట్‌చాయ్‌-పక్కాపోన్‌ ద్వయంపై గెలిచి స్కోరు సమం చేసింది. రెండో సింగిల్స్‌లో లక్ష్యసేన్‌ 21-12, 19-21, 21-16తో పనిట్‌చాపోన్‌పై.. డబుల్స్‌లో అర్జున్‌-ధ్రువ్‌ జంట 21-19, 21-15తో టనాడాన్‌-వాచిరావిత్‌ జోడీపై నెగ్గడంతో భారత్‌ 3-1తో తిరుగులేని ఆధిక్యంలో నిలిచింది. ఆఖరి సింగిల్స్‌లో శ్రీకాంత్‌ 21-9, 21-5తో శరణ్‌ను ఓడించి భారత్‌ను 4-1తో గెలిపించాడు.