పారిస్‌కు ఏడుగురు షట్లర్లు

దిల్లీ: పారిస్‌ ఒలింపిక్స్‌లో భారత్‌ నుంచి ఏడుగురు షట్లర్లు పోటీపడబోతున్నారు. ఒలింపిక్‌ క్రీడల అర్హత ర్యాంకింగ్‌ ప్రకారం పి.వి.సింధు (మహిళల సింగిల్స్‌), హెచ్‌ఎస్‌.ప్రణయ్‌, లక్ష్యసేన్‌ (పురుషుల సింగిల్స్‌), సాత్విక్‌ సాయిరాజ్‌-చిరాగ్‌శెట్టి (పురుషుల డబుల్స్‌), అశ్విని పొన్నప్ప-తనీషా క్రాస్టో (మహిళల డబుల్స్‌) ఈ మెగా ఈవెంట్‌ బరిలో నిలిచారు. ఒలింపిక్స్‌కు అర్హత సాధించడానికి ప్రపంచ బ్యాడ్మింటన్‌ సమాఖ్య విధించిన గడువు సోమవారంతో ముగిసింది. తాజా బీడబ్ల్యూఎఫ్‌ ఒలింపిక్‌ ర్యాంకింగ్‌ ప్రకారం టాప్‌-16లో ఉన్న షట్లర్లు పారిస్‌ టికెట్‌ దక్కించుకున్నారు. ఈ నేపథ్యంలో రెండుసార్లు పతక విజేత సింధు (12), ప్రణయ్‌ (9), లక్ష్యసేన్‌ (13) సింగిల్స్‌లో.. సాత్విక్‌-చిరాగ్‌ (3), అశ్విని-తనీషా (13) డబుల్స్‌లో ఒలింపిక్స్‌లో ఆడే అవకాశం వచ్చింది. పుల్లెల గాయత్రి-ట్రీసా జాలీ జంట ఛాన్స్‌ కోల్పోయింది.