సంక్షిప్త వార్తలు (4)

కివీస్‌దే వన్డే సిరీస్‌ 

హామిల్టన్‌ (న్యూజిలాండ్‌): ఇంగ్లాండ్‌తో మూడు వన్డే సిరీస్‌ను మరో మ్యాచ్‌ మిగిలుండగానే న్యూజిలాండ్‌ 2-0తో చేజిక్కించుకుంది. బుధవారంరెండో వన్డేలో కివీస్‌ 5 వికెట్ల తేడాతో ఇంగ్లాండ్‌ను చిత్తు చేసింది. ‘మ్యాన్‌ ఆఫ్‌ ద మ్యాచ్‌’ టిక్నర్‌ (4/34) ధాటికి మొదట ఇంగ్లాండ్‌ 36 ఓవర్లలో 175 పరుగులకే కుప్పకూలింది. కెప్టెన్‌ హ్యారీ బ్రూక్‌ (34; 34 బంతుల్లో 3×1, 1×6), జేమీ ఒవర్టన్‌ (42; 28 బంతుల్లో 4×4, 2×6) పర్వాలేదనిపించారు. కివీస్‌ 16.5 ఓవర్లు మిగిలివుండగానే 5 వికెట్లే కోల్పోయి లక్ష్యాన్ని ఛేదించింది. రచిన్‌ రవీంద్ర (54; 58 బంతుల్లో 7×4, 1×6), మిచెల్‌ (56 నాటౌట్‌; 59 బంతుల్లో 6×4, 2×6) రాణించారు. ఇంగ్లాండ్‌ బౌలర్లలో ఆర్చర్‌ (3/23) ఆకట్టుకున్నాడు.

జైవీర్‌కు రజతం 

రచన, కోమల్‌లకు కాంస్యాలు

బహ్రెయిన్‌: యూత్‌ ఆసియా క్రీడల్లో భారత రెజ్లర్‌ జైవీర్‌ సింగ్‌ రజతం సాధించాడు. బాలుర 55 కేజీల  ఫ్రీస్టైల్‌ విభాగం ఫైనల్లో అతను 2-6తో జపాన్‌ రెజ్లర్‌ యమటో ఫురుసావా చేతిలో ఓటమి పాలయ్యాడు. రెజ్లింగ్‌ బాలికల 43 కేజీల విభాగంలో రచన కాంస్యం సాధించింది. ఆమె కంచు పోరులో 11-0తో ప్రత్యర్థిని చిత్తు చేసింది. 49 కేజీల ఫ్రీస్టైల్‌లో కోమల్‌ వర్మ.. జియాకింగ్‌ను ఓడించి కాంస్యం నెగ్గింది. గౌరవ్‌ పునియా (65 కేజీలు ఫ్రీస్టైల్‌), మోని (57 కేజీల ఫ్రీస్టైల్‌), అశ్విని వైష్ణోయ్‌ (69 కేజీల ఫ్రీస్టైల్‌) స్వర్ణాల కోసం పోటీ పడనున్నారు.

పాకిస్థాన్‌ స్థానంలో ఒమన్‌ 

లౌసానె: జూనియర్‌ హాకీ ప్రపంచకప్‌లో పాకిస్థాన్‌ స్థానంలో ఒమన్‌ ఆడనుంది. ఈ విషయాన్ని అంతర్జాతీయ హాకీ సమాఖ్య (ఎఫ్‌ఐహెచ్‌) ధ్రువీకరించింది. చెన్నై, మదురైలలో నవంబరు 28 నుంచి జరగాల్సిన ఈ టోర్నీ నుంచి పాకిస్థాన్‌ వైదొలగడంతో ఒమన్‌కు అవకాశం దక్కింది. ఈ టోర్నమెంట్లో మొత్తం 24 జట్లు పోటీపడతాయి. జట్లను ఆరు గ్రూపులుగా విభజించారు.

డిఫెండింగ్‌ ఛాంపియన్‌కు అనాహత్‌ షాక్‌ 

టొరంటో (కెనడా): భారత క్రీడాకారిణి అనాహత్‌ సింగ్‌ కెనడియన్‌ ఉమన్స్‌ ఓపెన్‌ స్క్వాష్‌ టోర్నమెంట్లో సెమీఫైనల్‌కు దూసుకెళ్లింది. క్వార్టర్‌ఫైనల్లో ఆమె 3-0 (12-10, 11-9, 11-9)తో డిఫెండింగ్‌ ఛాంపియన్, రెండో సీడ్‌ టిన్‌ గిలిస్‌ (బెల్జియం)కు షాకిచ్చింది. ప్రపంచ ర్యాంకింగ్స్‌లో గిలిస్‌ ప్రస్తుతం ఏడో స్థానంలో ఉంది. టాప్‌-10 ప్లేయర్‌పై గెలవడం ఆమెకిదే తొలిసారి. అనాహత్‌ సెమీఫైనల్లో ప్రపంచ నంబర్‌ 10 జినా కెనెడీతో తలపడుతుంది.