Hyderabad vs Rajasthan: హైదరాబాద్‌.. ఫస్ట్‌ బ్యాటింగ్‌ చేస్తారా? 300 కొట్టేస్తారా?

ఇంటర్నెట్ డెస్క్‌: ఐపీఎల్ 17వ సీజన్‌లో ఉప్పల్‌ స్టేడియం మరో మ్యాచ్‌కు వేదికగా నిలవనుంది. పాయింట్ల పట్టికలో అగ్రస్థానంలో ఉన్న రాజస్థాన్‌ ఈ మ్యాచ్‌లోనూ విజయం సాధిస్తే ప్లేఆఫ్స్‌ బెర్తు ఖాయమవుతుంది. మరోవైపు గత రెండు మ్యాచుల్లో ఓడిన హైదరాబాద్‌ టాప్‌ -4 నుంచి కిందికి పడిపోయింది. ఇరు జట్ల మధ్య ఇవాళ రాత్రి 7.30 గంటలకు జరగనుంది.

మరో రికార్డు బద్దలు అవుతుందా? 

• ఉప్పల్‌ మైదానంలో ముంబయిపై హైదరాబాద్‌ 277 పరుగులు చేసింది. ట్రావిస్ హెడ్, అభిషేక్ శర్మ, క్లాసెన్ మంచి ఫామ్‌లో ఉన్నారు. మరోసారి రాజస్థాన్‌పై విజృంభిస్తే సన్‌రైజర్స్ విజయం సాధించడం పెద్ద కష్టమేం కాదు. 
•  ఐపీఎల్‌లోనే అత్యధిక స్కోరు (287) సన్‌రైజర్స్‌ పేరిటే ఉంది. దీంతో ఈసారి కూడా ఫస్ట్‌ బ్యాటింగ్‌ చేస్తే 300 స్కోరు చూసినా ఆశ్చర్యపోనక్కర్లేదు. 
•  ఐపీఎల్‌లో ఇరు జట్లు 18 మ్యాచుల్లో తలపడ్డాయి. చెరో తొమ్మిదేసి విజయాలతో కొనసాగుతున్నాయి. ఇప్పుడు ఎవరు గెలిస్తే వారు ఆధిక్యంలోకి వస్తారు.
• అత్యధిక పరుగులు చేసిన బ్యాటర్ల జాబితాలో సంజూ శాంసన్ (385) ఏడో ప్లేస్‌, ట్రావిస్ హెడ్ (338) 11వ స్థానంలో ఉన్నారు. 
• పర్పుల్ క్యాప్‌ను అందుకోవడానికి హైదరాబాద్‌ పేసర్ నటరాజన్‌ (13 వికెట్లు), రాజస్థాన్‌ స్పిన్నర్ యుజ్వేంద్ర చాహల్ (13 వికెట్లు) బరిలో ఉన్నారు. ప్రస్తుతం బుమ్రా (14) వద్ద ఈ క్యాప్‌ ఉంది. 
• ఐపీఎల్ 17వ సీజన్‌లో రాజస్థాన్‌ తొమ్మిది మ్యాచుల్లో ఎనిమిది విజయాలు సాధించింది. 16 పాయింంట్లతో కొనసాగుతోంది. హైదరాబాద్ తొమ్మిదింట్లో కేవలం ఐదు మ్యాచుల్లోనే గెలిచింది. 
• ఉప్పల్ పిచ్ బ్యాటింగ్‌కు అనుకూలం. టాస్‌ నెగ్గే జట్టు లక్ష్య ఛేదనకు మొగ్గు చూపనుంది. గత రెండు మ్యాచుల్లో ఒకసారి టార్గెట్‌ను విజయవంతంగా పూర్తి చేసిన హైదరాబాద్‌.. బెంగళూరుపై మాత్రం విఫలమైంది. 
• ఈ మ్యాచ్‌లో ట్రావిస్ హెడ్, సంజూ శాంసన్, యుజ్వేంద్ర చాహల్ కీలక పాత్ర పోషించే అవకాశాలు ఉన్నట్లు క్రికెట్ పండితుల అంచనా. క్లాసెన్, అభిషేక్ శర్మ ఆట కూడా అభిమానులను అలరించనుంది.
• లక్ష్య ఛేదనలో విఫలమవుతున్న హైదరాబాద్‌ ఈసారి మాత్రం పట్టువిడకుండా ఆడాలి. కేవలం ముగ్గురిపైనే ఆధారపడకుండా.. మిగతా బ్యాటర్లూ రాణించాలి. బౌలింగ్‌లోనూ కాస్త పొదుపు పాటించాల్సిందే. 
• ‘యశస్వి జైస్వాల్ - జోస్ బట్లర్’.. ‘హెడ్ - అభిషేక్ శర్మ’ జోడీల్లో ఆధిపత్యం ప్రదర్శిస్తుందో ఆసక్తికరంగా మారింది.

తుది జట్లు (అంచనా): 

హైదరాబాద్‌: అభిషేక్ శర్మ, ట్రావిస్ హెడ్, ఐదెన్ మార్‌క్రమ్, హెన్రిచ్ క్లాసెన్ (వికెట్ కీపర్), నితీశ్‌ రెడ్డి, అబ్దుల్ సమద్, షహబాజ్ అహ్మద్, పాట్ కమిన్స్ (కెప్టెన్), భువనేశ్వర్ కుమార్, జయ్‌దేవ్ ఉనద్కత్, నటరాజన్‌

రాజస్థాన్‌: యశస్వి జైస్వాల్, జోస్ బట్లర్, సంజూ శాంసన్ (కెప్టెన్/వికెట్ కీపర్), రియాన్ పరాగ్, షిమ్రోన్ హెటమయేర్, ధ్రువ్ జురెల్, రవిచంద్రన్ అశ్విన్, ట్రెంట్ బౌల్ట్, అవేశ్‌ ఖాన్, సందీప్ శర్మ, యుజ్వేంద్ర చాహల్