India vs Nepal : భారత్‌ vs నేపాల్‌ మ్యాచ్‌ వర్షం కారణంగా రద్దయితే.. పరిస్థితి ఏంటి?

ఇంటర్నెట్‌ డెస్క్‌ : ఆసియా కప్‌ (Asia Cup 2023 )లో ఇప్పటికే టీమ్‌ ఇండియా మ్యాచ్‌ ఒకటి వర్షం కారణంగా రద్దయింది. ఇప్పుడు మరో మ్యాచ్‌పై వర్షం ప్రభావం ఉంటుందని వాతావరణ శాఖ చెబుతోంది. ఈ నేపథ్యంలో గ్రూప్‌ 4 పరిస్థితి ఏంటి? అనే చర్చ మొదలైంది. నేపాల్‌ మ్యాచ్‌ కూడా వర్షం కారణంగా రద్దయితే ఎవరు సూపర్‌-4లోకి అడుగుపెడతారు, ఆ లెక్కేంటో చూద్దాం.

చిరకాల ప్రత్యర్థులు భారత్‌ - పాకిస్థాన్‌ (IND vs PAK) మధ్య శనివారం జరిగిన మ్యాచ్‌ వర్షం కారణంగా రద్దయిన విషయం తెలిసిందే. దీంతో ఇరు జట్లకు చెరో పాయింట్‌ లభించింది. అప్పటికే నేపాల్‌పై ఘన విజయం సాధించిన పాక్‌.. సూపర్‌ 4లోకి అడుగుపెట్టింది. మరోవైపు సోమవారం అదే పల్లెకెలె వేదికగా నేపాల్‌తో భారత్‌ (India vs Nepal) మ్యాచ్‌ ప్రారంభమైంది. ఈ మ్యాచ్‌పై కూడా వరుణుడి ప్రభావం ఉండే అవకాశాలున్నట్లు వాతావారణ నివేదికలు చెబుతున్నాయి. ఇప్పటికే మైదానం ఓవైపు అంతా మేఘావృతం అయింది. 

ఒలింపిక్స్‌లో క్రికెట్‌ దూకుడు..!

నేపాల్‌ మ్యాచ్‌ కూడా వర్షం కారణంగా రద్దు అయితే.. ఇరుజట్లకు చెరో పాయింట్‌ లభిస్తుంది. అప్పుడు టీమ్‌ఇండియా 2 పాయింట్లతో నేపాల్‌ కంటే ముందుంటుంది. దీంతో భారతే సూపర్‌ 4లోకి అడుగుపెడుతుంది. అప్పుడు గ్రూప్‌ A నుంచి భారత్‌, పాక్‌ సూపర్‌ 4కు చేరుకున్న జట్లుగా నిలుస్తాయి. ఒకవేళ నేపాల్‌ సూపర్‌ 4కు వెళ్లాలంటే.. భారత్‌పై తప్పక విజయాన్ని నమోదు చేయాలి. అలాగే మ్యాచ్‌కు వర్షం అంతరాయం కలిగించకూడదు.

దీంతో మ్యాచ్‌ సజావుగా సాగాలని ఆ దేశం అభిమానులు కోరుకుంటున్నారు. అయితే.. పసికూన నేపాల్‌పై టీమ్‌ఇండియా గెలిచే అవకాశాలే ఎక్కువగా ఉన్నాయి. మ్యాచ్‌ జరిగి ఆ జట్టుపై ఘనవిజయం సాధించాలనే టీమ్‌ఇండియా కోరుకుంటోంది. నేపాల్‌తో జరుగుతున్న మ్యాచ్‌లో టాస్‌ గెలిచిన భారత్‌ తొలుత బౌలింగ్‌ ఎంచుకుంది.