నైగర్‌లో ఫ్రాన్స్‌ రాయబార కార్యాలయానికి నిప్పు

సైనిక ప్రభుత్వ మద్దతుదారుల దుశ్చర్య

నియామి: నైగర్‌లోని సైనిక ప్రభుత్వ మద్దతుదారులు రాజధాని నియామిలో ఆదివారం భారీ ఎత్తున ర్యాలీ నిర్వహించారు. ఈ సందర్భంగా రష్యా పతాకాలు చేతబట్టి, రష్యా అధ్యక్షుడు పుతిన్‌ పేరును నినదించారు. తమను చాలా కాలం పరిపాలించిన ఫ్రాన్స్‌ను నిందించారు. ఈ సందర్భంగా ఫ్రెంచ్‌ రాయబార కార్యాలయం మీదుగా వెళ్తు వారు దాని తలుపునకు నిప్పంటించారు. ఆ సమయంలో కార్యాలయంలో ఒకరు ఉన్నట్లు కనిపిస్తున్న వీడియోలు వైరల్‌ అయ్యాయి. ఆందోళనకారుల ఆగడాలతో మరోపక్క నగరం నలుమూలలా నల్లటి పొగలు కమ్ముకున్నాయి. నైగర్‌ సైన్యం వారిని చెదరగొట్టింది. తమ రాయబార కార్యాలయం, తమ దేశ ప్రయోజనాలపై దాడులను ఉపేక్షించబోమని ఫ్రాన్స్‌ అధ్యక్షుడు ఇమ్మాన్యుయేల్‌ మెక్రాన్‌ పేర్కొన్నారు. ఫ్రాన్స్‌ పౌరులు, సైన్యం, రాయబారులు, ఫ్రెంచ్‌ అధికారులపై ఎవరైనా దాడికి పాల్పడితే తక్షణం వారు మా ప్రతిస్పందనను చవిచూస్తారని హెచ్చరించారు.