కెనడా ఆలయాల్లో చోరీలు.. భారత సంతతి వ్యక్తి అరెస్టు

టొరంటో: కెనడాలోని హిందూ దేవాలయాల్లో పలుమార్లు చోరీలకు పాల్పడిన భారత సంతతి వ్యక్తిని పోలీసులు అరెస్టుచేశారు. నిందితుడిని జగదీశ్‌ పంధేర్‌(41)గా గుర్తించినట్లు గ్రేటర్‌ టొరంటో పోలీసులు గురువారం ప్రకటించారు. ఇతను అక్టోబరు 8 తెల్లవారుజామున పికరింగ్‌లోని బెయిలీ స్ట్రీట్‌, క్రోస్నో బౌల్‌వార్డ్‌లలోని ఆలయాల్లో చోరీకి పాల్పడినట్లు వెల్లడించారు. ఆలయాల్లోని హుండీల్లో భారీగా నగదు దోచుకున్న దృశ్యాలు నిఘా కెమెరాల్లో కనిపించాయని వెల్లడించారు. ఈ ఏడాదిలో నమోదైన ఇతర ఆలయాల దోపిడీల్లోనూ నిందితుడి ప్రమేయం ఉందని అనుమానిస్తున్నామన్నారు. ఆలయాల్లో చొరబడటం, చోరీలకు పాల్పడడం.. ఇలా నాలుగు రకాల అభియోగాల్ని పంధేర్‌పై నమోదుచేసినట్లు పోలీసులు వివరించారు.