హూతీల దాడికి గురైన నౌకకు భారత్‌ అండ

రంగంలోకి ఐఎన్‌ఎస్‌ కోచి

దిల్లీ: ఎర్రసముద్రంలో నెలకొన్న ఉద్రిక్త పరిస్థితుల్లో మళ్లీ భారత నౌకాదళం తన సత్తా చూపింది. హూతీ వేర్పాటువాదుల క్షిపణి దాడికి గురైన ఎంవీ ఆండ్రోమేడా స్టార్‌ నౌకకు అండగా నిలిచింది. దాడి సమాచారం అందగానే నౌకాదళానికి చెందిన ఐఎన్‌ఎస్‌ కోచి స్పందించింది. ఆ నౌక దగ్గరకు వెళ్లి పరిస్థితిని సమీక్షించింది. అందులోని 22 మంది భారతీయులు సహా 30 మంది సిబ్బంది సురక్షితంగా ఉన్నట్లు ధ్రువీకరించింది. నౌక భద్రతా పరిస్థితినీ ఐఎన్‌ఎస్‌ కోచిలోని నిపుణుల బృందం అంచనా వేసింది. అనంతరం నౌక ప్రయాణానికి సాంకేతికంగా ఎలాంటి ఇబ్బందులు లేవని ప్రకటించింది. రష్యాలోని ప్రిమోస్క్‌ నుంచి బయల్దేరిన ఈ ముడిచమురు నౌక భారత్‌లోని వాడినార్‌కు త్వరలో చేరనుంది. మరోవైపు హూతీల దాడిలో తమ ఎంక్యూ-9 రీపర్‌ డ్రోన్‌ కూలిందని అమెరికా అంగీకరించింది. దీనిపై విచారణ నిర్వహిస్తున్నామని సైన్యం తెలిపింది.