గుండెజబ్బుల ముప్పును పెంచే వాహన ధ్వనులు

దిల్లీ: వాహనాల రణగొణ ధ్వనులు గుండె జబ్బుల ముప్పును పెంచుతాయని అంతర్జాతీయ శాస్త్రవేత్తల పరిశోధనలో తేలింది. ఇందులో గుండెపోటు ముప్పు కూడా ఉందని వెల్లడైంది. వ్యాధులకు సంబంధించిన డేటాను సమీక్షించిన పరిశోధకులు ఈ విషయాన్ని గుర్తించారు. ఈ నేపథ్యంలో ఈ రకం ధ్వని కాలుష్యాన్ని కూడా గుండెజబ్బుల ముప్పు అంశంగా పరిగణించి, నివారణ చర్యలు చేపట్టాలని శాస్త్రవేత్తలు కోరుతున్నారు. వీరి అధ్యయనంలో వెల్లడైన అంశాలివీ..

• ప్రతి 10 డెసిబల్స్‌ మేర పెరిగే ట్రాఫిక్‌ ధ్వని వల్ల గుండె జబ్బులు, పక్షవాతం, మధుమేహం ముప్పు 3.2 శాతం మేర పెరుగుతుంది.
• ముఖ్యంగా రాత్రివేళ ట్రాఫిక్‌ శబ్దాలు నిద్రకు ఆటంకాలు కలిగిస్తాయి. నిద్రా సమయాన్ని తగ్గించేస్తాయి. దీనివల్ల రక్తనాళాల్లో ఒత్తిడి హార్మోన్ల స్థాయి పెరగొచ్చు. ఫలితంగా ఇన్‌ఫ్లమేషన్‌, అధికరక్తపోటు, గుండె జబ్బులకు ఆస్కారం పెరుగుతుంది.

ఇలా తగ్గించుకోవచ్చు..

• రోడ్లు, రైలు, విమాన ట్రాఫిక్‌ ద్వారా చోటుచేసుకునే శబ్ద కాలుష్యాన్ని తగ్గించడానికి పరిశోధకులు పలు వ్యూహాలను సూచించారు.
• జనాభా సాంద్రత అధికంగా ఉన్న ప్రాంతాల్లో రద్దీ ఎక్కువగా ఉన్న రోడ్ల వెంబడి ‘నాయిస్‌ బ్యారియర్ల’ను ఏర్పాటు చేయాలి. దీనివల్ల 10 డెసిబల్స్‌ వరకూ ధ్వని స్థాయి తగ్గుతుంది.
• ధ్వనిని తగ్గించే ప్రత్యేక తారుతో రోడ్లను నిర్మించడం వల్ల శబ్ద కాలుష్యం 3-6 డెసిబల్స్‌ వరకూ తగ్గొచ్చు.
• వాహనాల వేగాన్ని పరిమితం చేయాలి. తక్కువ శబ్దాన్ని కలిగించే టైర్ల వినియోగాన్ని ప్రోత్సహించాలి.  
• సైకిళ్లపై ప్రయాణాలకు ప్రాధాన్యమివ్వాలి. వాహనాల పూలింగ్‌, ప్రజారవాణా వినియోగానికి పెద్దపీట వేయాలి.
•  రైళ్లతో ఉత్పన్నమయ్యే ధ్వని కాలుష్యాన్ని తగ్గించడానికి ఎప్పటికప్పుడు రైల్వేల్లో నిర్వహణ పనులు చేపట్టాలి. బ్రేక్‌ వ్యవస్థను కాలానుగుణంగా మెరుగుపరచాలి.