UkraineCrisis: ఉక్రెయిన్‌ సరిహద్దుల్లోని రష్యా పట్టణంలో భారీ పేలుడు

ఇంటర్నెట్‌డెస్క్‌: ఉక్రెయిన్‌ సరిహద్దుల్లోని రష్యా నగరం బ్రయాన్స్క్‌లో సోమవారం తెల్లవారుజాము భారీ పేలుడు సంభవించింది. ఈ ఘటన జరిగిన ప్రదేశంలో చమురు డిపో ఉంది. ఆ ప్రాంతంలో భారీగా మంటలు వ్యాపించాయి. ఈ ఘటనకు గల కారణాలు తెలియరాలేదు. రష్యాలోని చమురు సరఫరా కంపెనీ ట్రాన్స్‌నెఫ్ట్‌కు సంబంధించిన పైప్‌లైన్లు కూడా అక్కడ ఉన్నట్లు భావిస్తున్నారు. ఈ ఘటనకు సంబంధించి ఉక్రెయిన్‌ వైపు నుంచి ఎటువంటి ప్రకటన వెలువడలేదు. ఈ  పట్టణంలో సుమారు 4లక్షల మంది ప్రజలు ఉన్నారు. రష్యా అధికారులు ఈ ఘటనపై దర్యాప్తు చేపట్టారు. మరో వైపు ఉక్రెయిన్‌కు చెందిన కీవ్‌ పోస్ట్‌ పత్రిక మాత్రం రెండు చమురు డిపోలు దహనమవుతున్నాయని కథనంలో పేర్కొంది. 

ఉక్రెయిన్‌ సరిహద్దుకు ఈశాన్యంగా 154 కిలోమీటర్ల దూరంలో బ్రయాన్స్క్‌ నగరం ఉంది. ఈ నెల రెండోవారంలో ఉక్రెయిన్‌ హెలికాప్టర్లు పౌరుల ఇళ్లను లక్ష్యంగా చేసుకొని దాడులు చేశాయి. ఈ దాడుల్లో మొత్తం ఏడుగురు రష్యా పౌరులు గాయపడ్డారు. అదే సమయంలో బెల్‌గోర్డ్‌లో కూడా ఒక చమురు డిపోను ఉక్రెయిన్‌ హెలికాప్టర్లు పేల్చివేశాయి.