Mayor marriage with crocodile: మొసలితో మేయర్‌ పెళ్లి.. ఎందుకో తెలుసా!

మెక్సికో సిటీ: సాధారణంగా కొన్ని ప్రాంతాల్లో ప్రజలు వర్షాల కోసం లేదా పంటలు బాగా పండటం కోసం ప్రార్థిస్తూ విభిన్న ఆచారాలు పాటిస్తారు. ఓ ప్రాంతంలో మాత్రం ప్రజలంతా కలిసి పట్టణ మేయర్‌ (mayor)కు వివాహం (marriage)జరిపించడం వారి సంప్రదాయం. ఆ వివాహం మహిళతో కాదండోయ్‌.. ఒక ఆడ మొసలి(crocodile)తో..! 

దక్షిణ మెక్సికో (southern Mexico)లోని  శాన్ పెడ్రో హువామెలులా (San Pedro Huamelula)అనే పట్టణంలోనిది ఈ సంప్రదాయం.  విక్టర్ హ్యూగో సోసా (Victor Hugo Sosa,) అనే మేయర్‌ చొంటల్, హువే అనే రెండు సమూహాల మధ్య శాంతిని ఇలాగే కొనసాగించాలనే ఉద్దేశంతో అలీసియా అడ్రియానా అనే ఆడ మొసలిని వివాహం చేసుకున్నారు. 230 ఏళ్లుగా తమ పూర్వికుల నుంచి ఈ ఆచారాన్ని పాటిస్తున్నారట. ఈ వివాహం తమ ప్రాంత ప్రజలకు మరింత అదృష్టాన్ని తెస్తుందని వారి నమ్మకం. ప్రజలు పెళ్లికుమారుడిని చొంటల్‌ రాజుగా.. మొసలిని రాణిగా భావిస్తారు.

అయితే.. ఈ వేడుకకు ముందు ప్రజలు మొసలిని తమ ఇంటికి తీసుకు వెళ్లి ప్రత్యేక నృత్యం చేస్తారు. అనంతరం మొసలిని పెళ్లి వస్త్రాలతో అలంకరిస్తారు. భద్రత కోసం దాని ముక్కుకు తాడును కడతారు. మత్స్యకారులు వలలతో నృత్యాల్లో పాల్గొంటారు. ఈ వేడుకను ఒక పెద్ద పండుగగా నిర్వహిస్తాం. వరుడు వధువు(మొసలి)ను ఎత్తుకుని నృత్యం చేసి దాని నుదుటిపై ముద్దు పెట్టడంతో వేడుక ముగుస్తుంది. ‘‘మేం ఒకరినొకరం ప్రేమించుకుంటున్నాం. నేను నా భార్య పట్ల బాధ్యతగా వ్యవహరిస్తాను’’అని సోసా తెలిపారు.