ఇంటర్నెట్‌ డెస్క్‌: భిన్నమైన నేపథ్యమున్న రెండు వేర్వేరు జంటల కథ ఆధారంగా తెరకెక్కిన క్రైమ్‌ థ్రిల్లర్‌ ‘లూకా’. 2019లో విడుదలైన ఈ మలయాళ చిత్రం ప్రేక్షకులను విశేషంగా ఆకట్టుకుంది. అరున్‌బోస్‌ దర్శకత్వంలో తెరకెక్కిందీ చిత్రం. టొవినో థామస్‌, అహాన కృష్ణ, నితిన్‌జార్జ్‌, వినిత కీలక పాత్రల్లో కనిపించారు. మలయాళంలో అందర్నీ ఆకట్టుకున్న ‘లూకా’ ఇప్పుడు తెలుగులోనూ అలరించేందుకు సిద్ధమైంది.  ప్రముఖ తెలుగు ఓటీటీ వేదిక ‘ఆహా’ తెలుగులోకి అనువదిస్తోంది. మార్చి 5నుంచి ప్రసారం చేయనున్నట్లు ప్రకటించింది కూడా. ‘త్వరలోనే జానీ, నిహారిక కథను మీకు వివరించబోతున్నాం’ అంటూ ఆహా డైరీ పేరుతో ట్విటర్లో ఒక పోస్టు చేసింది. ఈ చిత్ర మాతృకలో లూకాగా థామస్‌, నిహారికగా అహాన కృష్ణ కనిపించారు. సూరజ్‌ ఎస్‌.కురుప్‌ సంగీతం అందించారు. ప్రిన్స్‌ హుస్సేన్‌ నిర్మాత.