క్రీడాకారులకు అవకాశాలు!

నార్తర్న్‌ రైల్వేలో స్పోర్ట్స్‌ కోటా

న్యూదిల్లీలోని రైల్వే రిక్రూట్‌మెంట్‌ సెల్‌, నార్తర్న్‌ రైల్వే స్పోర్ట్స్‌ కోటా గ్రూప్‌-డి 38 పోస్టుల భర్తీకి ప్రకటన విడుదల చేసింది. వీటికి ఆన్‌లైన్‌లో దరఖాస్తు చేసుకోవాలి. ఒకటికంటే ఎక్కువ విభాగాల్లో పోటీ పడాలంటే ప్రతి క్రీడకూ వేర్వేరుగా దరఖాస్తు చేసి, ఫీజు చెల్లించాలి.

క్రీడాంశాలు: ఫుట్‌బాల్‌, వెయిట్‌ లిఫ్టింగ్‌, అథ్లెటిక్స్‌, బాక్సింగ్‌, స్విమ్మింగ్‌, టేబుల్‌ టెన్నిస్‌, హాకీ, బ్యాడ్మింటన్‌, కబడ్డీ, రెజ్లింగ్‌, చెస్‌.

పదో తరగతి/ మెట్రిక్యులేషన్‌/ తత్సమాన పరీక్ష పాసవడంతోపాటు సంబంధిత క్రీడాంశంలో వివిధ స్థాయుల్లో ప్రతిభ చూపాలి. 01.07.2024 నాటికి 18-25 సంవత్సరాల మధ్య ఉండాలి. దరఖాస్తు ఫీజు రూ.500. ఎస్సీ/ ఎస్టీ, మహిళలు, ఈబీసీ, మైనారిటీలకు రూ.250.

క్రీడార్హతలు: 01.04.2021 నుంచీ వివిధ ఛాంపియన్‌షిప్‌ పోటీల్లో పాల్గొన్నవారు దరఖాస్తు చేయడానికి అర్హులు.

• క్రీడా విభాగంలో ఏ స్థాయిలో పాల్గొన్నారనే వివరాలను ఆన్‌లైన్‌ దరఖాస్తులో స్పష్టంగా రాయాలి.
• వివిధ క్రీడల్లో సాధించిన ఛాంపియన్‌షిప్‌లకు అంతర్జాతీయ/ జాతీయ/ రాష్ట్ర స్పోర్ట్స్‌ ఫెడరేషన్‌, రైల్వే స్పోర్ట్స్‌ ప్రమోషన్‌ బోర్డ్‌ గుర్తింపు ఉండాలి.
• కేటగిరీ ‘సి’ ఛాంపియన్‌షిప్స్‌/ ఈవెంట్లలో దేశానికి ప్రాతినిథ్యం వహించాలి.

లేదా ఫెడరేషన్‌ కప్‌ ఛాంపియన్‌షిప్స్‌లో (సీనియర్‌ కేటగిరి) కనీసం మూడో స్థానం పొందాలి.

ఎంపిక: స్క్రీనింగ్‌, ధ్రువపత్రాల పరిశీలన అనంతరం.. ట్రయల్స్‌ నిర్వహిస్తారు. వీటిల్లో మెరుగైన ప్రదర్శన ఇచ్చిన అభ్యర్థులనే తర్వాతి దశకు ఎంపిక చేస్తారు. అభ్యర్థుల ప్రతిభను ట్రయల్‌ కమిటీ అంచనా వేసి.. అర్హులో కాదో నిర్ణయిస్తుంది.

• ట్రయల్స్‌ కోసం అభ్యర్థులు సొంత ప్లేయింగ్‌ కిట్‌ను తెచ్చుకోవాలి.
• ప్రతిభ కనబరిచిన అభ్యర్థులకు 25 మార్కులు, ఆపైన, ప్రదర్శన సంతృప్తికరంగాలేని అభ్యర్థులకు 25 కంటే తక్కువ మార్కులు ఇస్తారు.
• ప్రతిభ కనబరిచినవారిని రెండో దశకు ఎంపిక చేస్తారు. క్రీడా విజయాలకు 50 మార్కులు, విద్యార్హతలు, జనరల్‌ ఇంటెలిజెన్స్‌/ పర్సనాలిటీకి 10 మార్కులు కేటాయిస్తారు.
• రెండు దశల్లోనూ అభ్యర్థులు సాధించిన మార్కుల ఆధారంగా ఎంపిక చేస్తారు. కనీసార్హత మార్కులు 60.
• ఈ మార్కులు సాధించిన వారికి మెడికల్‌ ఫిట్‌నెస్‌ పరీక్ష నిర్వహించి తుది ఎంపిక చేస్తారు. వీరికి రెండేళ్ల ప్రొబేషన్‌ పీరియడ్‌ ఉంటుంది.

దరఖాస్తుకు చివరి తేదీ: 16.05.2024
ట్రయల్‌ తేదీ: 10.06.2024
వెబ్సైట్‌: www.rrcnr.org