ఎన్విరాన్‌మెంటల్‌ సైన్స్‌ కోర్సు చేయాలంటే..?

ఎన్విరాన్‌మెంటల్‌ సైన్స్‌ కోర్సు చేయాలంటే..?

*ఇంటర్‌ తరువాత ఎన్విరాన్‌మెంటల్‌ సైన్స్‌ చదవాలంటే ఇంటర్‌లో ఏ గ్రూపు తీసుకుంటే మంచిది? ఈ కోర్సు గురించిన పూర్తి సమాచారాన్ని అందించండి.

పర్యావరణ భౌతిక, రసాయన, జీవ సంబంధిత భాగాలను పరస్పరం అధ్యయనం చేసే విజ్ఞానశాస్త్రమే ఎన్విరాన్‌మెంటల్‌ సైన్స్‌. ఇది జీవ, రసాయనిక, భూగోళశాస్త్రాల కలయిక. అందుకే దీన్ని ఇంటర్‌ డిసిప్లినరీ ఫీల్డ్‌గా పరిగణిస్తారు. ఈ శాస్త్రం సాంఘిక, మానవీయ శాస్త్రాలతో కూడా సంబంధం కలిగి ఉంటుంది. బీఎస్‌సీ (ఎన్విరాన్‌మెంటల్‌ సైన్స్‌) మాత్రమే కాకుండా ఈ రంగంలో బీటెక్‌ (ఎన్విరాన్‌మెంటల్‌ ఇంజినీరింగ్‌)ను కూడా ఇంటర్‌ తరువాత ఎంచుకోవచ్చు.
ఇంటర్‌లో ఎంపీసీ/ బైపీసీ ఏదైనా ఎంపిక చేసుకోవచ్చు. ఎన్విరాన్‌మెంటల్‌ ఇంజినీరింగ్‌/ టెక్నాలజీ కోర్సుల్లో చేరాలంటే ఎంపీసీ ఎంచుకోవడం మంచిది. జీవశాస్త్ర కలయిక కోసం బైపీసీ ఎంచుకోవడం శ్రేయస్కరం. బీఎస్‌సీ (ఎన్విరాన్‌మెంటల్‌ సైన్స్‌) లేదా బీటెక్‌ (ఎన్విరాన్‌మెంటల్‌ ఇంజినీరింగ్‌) రెండింటికీ కూడా చక్కని భవిష్యత్తు ఉంది. ప్రతిష్ఠాత్మక ఐఐటీ- ఖరగ్‌పూర్‌, ఐఐటీ-ఖాన్‌పూర్‌, ఐఐటీ-దిల్లీ, ఐఐటీ-రూర్కీ, ఐఐటీ-బాంబేల్లో బీటెక్‌లో ఈ కోర్సును అందిస్తున్నారు. జేఈఈ అడ్వాన్స్‌డ్‌ ఆధారంగా ప్రవేశాన్ని కల్పిస్తారు. తెలుగు రాష్ట్రాల్లో బీఎస్‌సీ ఇన్‌ ఎన్విరాన్‌మెంటల్‌ సైన్స్‌ను ఆల్‌ అమీర్‌ ఇన్‌స్టిట్యూట్‌ ఆఫ్‌ టెక్నాలజీ- రాజమండ్రి, శ్రీ గ్రంథి చిన సన్యాసి రాజు కాలేజ్‌- శ్రీకాకుళం, హోమ్‌సైన్స్‌ కాలేజ్‌- హైదరాబాద్‌, సెయింట్‌ ఫ్రాన్సిస్‌ కాలేజ్‌ ఫర్‌ విమెన్‌- హైదరాబాద్‌, ఆంధ్రా, కాకతీయ విశ్వవిద్యాలయాలు అందిస్తున్నాయి.