ఇసుక కోట... అతి పెద్దదంట!

ఇసుక కోట...అతి పెద్దదంట!

అదో ఇసుక కోట...ఈ మధ్యే కట్టారు... దానిపై తాజ్‌మహల్‌తో పాటు బోలెడు వింతలున్నాయి... పైగా ప్రపంచంలోనే అతి ఎత్తయిన ఇసుక కోట ఇదే!

 సైకత శిల్పాలు ఎన్నో చోట్ల చేస్తుంటారు. కానీ ఈ మధ్య కట్టిన ఒక ఇసుక కోట గిన్నిస్‌ రికార్డు కొట్టింది. ఇంత వరకూ ఎక్కడా ఇంత ఎత్తయిన ఇసుక కోట కట్టలేదు. ఈ కోట విశేషాలు చెప్పుకోవాలంటే బోలెడు ఉన్నాయి తెలుసా?

* అమెరికాలోని ఫ్లోరిడా రాష్ట్రంలో వర్జీనియా కీ బీచ్‌ పార్కులో ఈ ఇసుక కోటను ఈ మధ్యే నిర్మించారు సైకత శిల్పకారులు.

* ఈ కోట ఎత్తు సుమారు 50 అడుగులు ఉంది. అంటే దాదాపు నాలుగంతస్తుల భవనమంత అనుకోవచ్చు. పైగా ఈ కోటపై ప్రపంచ వింత కట్టడాలన్నింటినీ మలిచారు. మన దేశ అద్భుతం తాజ్‌మహల్‌తోపాటు, పారిస్‌ నగరంలో కొలువుదీరిన ఈఫిల్‌ టవర్‌, అమెరికాలోని స్టాట్యూ ఆఫ్‌ లిబర్టీ, ఇటలీకి చెందిన లీనింగ్‌ టవర్‌ ఆఫ్‌ పీసా లాంటి ఎన్నో చారిత్రక కట్టడాల ఆకారాలను ఈ కోటపైనే మలిచారు.

* కోట నిర్మాణానికి 12 మంది శిల్పకారులు శ్రమించారు. ఇందులో టెడ్‌ సీబర్ట్‌ అనే కళాకారుడికైతే ఇసుక శిల్పాల నిర్మాణంలో ఏడు ప్రపంచ రికార్డులు వచ్చాయి.

* గత నవంబరులో బ్రెజిల్‌లో కట్టిన ఓ ఇసుక కోటకు అతి ఎత్తయినదిగా రికార్డు వచ్చింది. దాని ఎత్తు 41 అడుగులు. ఇప్పుడు ఈ కొత్త ఇసుక కోటను దాని కన్నా ఎక్కువ ఎత్తుగా నిర్మించడంతో ఆ రికార్డును ఇది బద్దలు కొట్టిందన్నమాట!

* ఈ ఇసుక కోటను టర్కిష్‌ ఎయిర్‌ లైన్స్‌ వాళ్లు నిర్మిస్తున్నారు.

* ఈ సైకత కోట మొత్తం నిర్మాణానికి ఎంత ఇసుక అవసరమయ్యిందో తెలుసా? ఏకంగా 1800 టన్నులు. అంటే 18,00,000 కిలోల ఇసుక అన్నమాట!

* ఈ కోట మూడు వారాలపాటు మాత్రమే పర్యటకులకు కనువిందు చేస్తుంది. అయితే ఈ బీచ్‌లోని ఇసుకతో దీన్ని కట్టారనుకోకండి. ఒక గనిలో నుంచి ప్రత్యేకంగా ఇసుకను తెప్పించి, దానికి కాస్త బంకమట్టిని కలిపి కోటను చేశారు. బాగా వేగంగా గాలి వీచినా, భారీ వర్షం కురిసినా ఈ కోట కూలిపోతుందిట.