అందాల లోయలో...అద్భుత శిల్పాలు!

అందాల లోయలో...అద్భుత శిల్పాలు!

అనగనగా ఓ లోయ...అందులో అబ్బురపరిచే నిలువెత్తు రాతి విగ్రహాలు...కాలం గడిచే కొద్దీ వాటి సంఖ్య పెరుగుతోంది...ఇంతకీ ఎవరు చేస్తున్నారు? ఏమా సంగతులు?

గ్రానైట్‌ రాయితో ఏకశిలపై చెక్కిన ఈ శిల్పాలు ఒక్కోటి దాదాపు 15 అడుగులకు పైనే ఉంటాయి.

సాధువులు... ఆదర్శ మూర్తులు... చరిత్రలో వేరు వేరు కాలాలకు చెందినవారు ఒకే దగ్గర విగ్రహాల రూపంలో కొలువై ఉన్నారు. చూడాలంటే ఫ్రాన్స్‌లోని బ్రిటానీకి వెళ్లాల్సిందే.

* అక్కడో మారుమూల లోయ ఈ విగ్రహాల వల్ల ‘వ్యాలీ ఆఫ్‌ సెయింట్స్‌’గా ప్రసిద్ధికెక్కింది. ఫ్రాన్స్‌ ప్రజలకు స్ఫూర్తినిచ్చిన వ్యక్తుల విగ్రహాలను రూపొందించే పనిలో భాగమే ఇదంతా. ఇది ఏకంగా 50 ఏళ్ల పాటు సాగే ప్రాజెక్ట్‌. ఇప్పటి వరకు 66 మంది విగ్రహాలను చేసి లోయలో నెలకొల్పారు.

* చిలీ దేశానికి దగ్గరలో పసిఫిక్‌ సముద్రంలో ఉండే ఈస్టర్‌ ఐలాండ్‌ గురించి వినే ఉంటారుగా? అందులో వందలాది రాతి విగ్రహాలు ఉంటాయి. ఈ వింత దీవిలాగే సెయింట్స్‌ వ్యాలీని కూడా చేయాలనే ఉద్దేశమన్నమాట.

* 2008లో ఈ ప్రాజెక్టును మొదలుపెట్టారు.

* ప్రపంచవ్యాప్తంగా ఉన్న ప్రముఖ శిల్పుల్ని రప్పించి వీటిని చెక్కిస్తున్నారు. ఒక్కో శిల్పం చెక్కడానికి నెలల కొద్దీ సమయం పడుతోంది. ఒక విగ్రహం కోసం దాదాపు తొమ్మిదిలక్షల రూపాయల ఖర్చు పెడుతున్నారు.