కరచాలనం చేయండి ఫొటోలొద్దు!

కరచాలనం చేయండి ఫొటోలొద్దు!

బెనిన్‌

* బెనిన్‌... ఆఫ్రికా ఖండంలోని దేశం. ఈ దేశానికి పశ్చిమాన టోగో, తూర్పున నైజీరియా, ఉత్తరాన బుర్కినాఫాసో, నైజర్‌ దేశాలు సరిహద్దులు. దక్షిణాన అట్లాంటిక్‌ మహా సముద్ర భాగమైన గినియా అఖాతం ఉంది.

జెండా: ఎరుపు రంగు ధైర్యానికి, పసుపు రంగు సంపదకు, ఆకుపచ్చ ఆశకి సూచికలు.

* రాజధాని పోర్టోనోవొలో 17వ శతాబ్దం మొదట్లో బానిసల వ్యాపారం ఎక్కువగా జరిగేది. అందుకే ఈ తీరాన్ని బానిసల తీరంగా పిలిచేవారు. ఇక్కడి నుంచి బానిసల్ని నౌకల్లో వేరే ప్రాంతాలకు రవాణా చేయడం ద్వారా కోట్ల రూపాయల వ్యాపారం జరిగేది.
* బెనిన్‌ 1960 ఆగస్టు ఒకటిన ఫ్రాన్స్‌ నుంచి స్వాతంత్య్రం పొందింది.
* 1975 నవంబరు నుంచి ఈ దేశాన్ని బెనిన్‌ అని పిలుస్తున్నారు.
* 1990లో నియంతృత్వ పాలన నుంచి బహుళ పార్టీలున్న ప్రజాస్వామ్య దేశంగా మారింది.

* ఇక్కడ ఎడమ చేతితో తినడం కానీ, ఎడమ చేతితో ఇతరులకు ఏదైనా ఇవ్వడం కానీ చేయకూడదు. అలా చేస్తే అమర్యాదగా భావిస్తారు.

* ఈ దేశానికే దహోమి అని మరో పేరు. 17వ శతాబ్దం నుంచి 19వ శతాబ్దం వరకు ఇది దహోమి రాజ్యంగా ఉండేది.

దేశం: బెనిన్‌ రాజధాని: పోర్టో నోవొ జనాభా: 1,08,79,829 విస్తీర్ణం: 1,14,763 చదరపు కిలోమీటర్లు భాష: ఫ్రెంచ్‌ కరెన్సీ: పశ్చిమ ఆఫ్రికన్‌ సీఎఫ్‌ఏ ఫ్రాంక్‌

* ప్రజలు ఫ్రెంచ్‌ తర్వాత ఫాన్‌, యోరుబా భాషల్ని ఎక్కువగా మాట్లాడుతుంటారు.
* ఈ దేశప్రజలు ఎక్కువగా వ్యవసాయంపై ఆధార పడతారు.
* జాతీయ క్రీడ సాకర్‌.
* దేశంలో 31 శాతం భూభాగాన్ని వ్యవసాయానికి ఉపయోగిస్తారు. 40 శాతం అడవులతో నిండి ఉంటుంది.

* ఇక్కడ నేరాలు తక్కువే. కానీ దొంగతనాలు ఎక్కువ. అందుకే ప్రతి ఇంటి యజమానీ రాత్రి వేళల్లో వాచ్‌మేన్‌ను తప్పక పెట్టుకుంటారు.

* ఒకరితో మాట్లాడే ముందూ, వీడ్కోలు చెప్పాకా కరచాలనం చేయడం ఆనవాయితీ.
* ఇక్కడి ప్రజలు ఫొటోలు తీసుకోవడానికి ఇష్టపడరు. అవి దుర్వినియోగం అవుతాయని భావిస్తారు.

* రాజధాని పోర్టోనోవొని అడ్జటేజ్‌, హగ్‌బోనౌ అని కూడా పిలుస్తారు.
* దేశం మొత్తంలో పెద్ద నగరం కొటోనౌ.
* ప్రపంచవ్యాప్తంగా ఈ దేశం చెక్కతో చెక్కిన ముసుగులకు ప్రసిద్ధి.