నీటిలో ఇళ్లంట... సముద్రమే లోకమంట!

నీటిలో ఇళ్లంట... సముద్రమే లోకమంట!

ఓ చిత్రమైన వూరుంది. ఎక్కడంటే మలేసియా తీరంలో. తీరంలో అంటే సముద్రం ఒడ్డున అనుకునేరు... కానేకాదు. అది ఏకంగా సముద్రంలోనే ఉంది మరి. భూమిపై ఉండేందుకు బోలెడు చోటుండగా అసలు వీళ్లు సముద్రంలోనే ఇళ్లు ఎందుకు కట్టుకున్నారబ్బా... అనిపిస్తే, ఈ వివరాలు తెలుసుకోవాల్సిందే..!

* కొన్నేళ్ల క్రితం ఫిలిప్పీన్స్‌ నుంచి బజావు అనే తెగవాళ్లు మలేషియాలోకి వలస వచ్చేయబోయారు. ఆ దేశాధికారులు మాత్రం వాళ్లని తమ దేశంలోకి అడుగుపెట్టనే పెట్టనివ్వలేదు. దీంతో వాళ్లు తిరిగి వెళ్లలేక మలేషియాలోని సాభా తీర సముద్రంలో చెక్కతో ఇలా ఇళ్లు కట్టేసు కున్నారన్నమాట!

* పొడవాటి కర్రల్ని సముద్రం అడుగు ఇసుకలోకి దూర్చి పునాదుల్లా వేసుకున్నారు. నీరు ఇళ్లలోకి రానంత ఎత్తులో కర్రలు, ఆకులతో గుడిసెలు నిర్మించుకున్నారు.

* ఇక్కడ పిల్లలకు మనలాగా బడులేమీ ఉండవు. సముద్రంలోనే వారి ఆటాపాటా. ఒక ఇంటి నుంచి మరో ఇంటికి వెళ్లేందుకు, అక్కడక్కడే నీటిలో షికారు కొట్టేందుకు వాళ్లే పడవలు నడిపేస్తుంటారు. ఈతా కొట్టేస్తారు.

* కొంత మంది పిల్ల పిడుగులైతే పెద్దవాళ్లతోపాటు సముద్రం లోతుల్లోకి వెళ్లి చేపలు, ఆక్టోపస్‌ల్లాంటి వాటినీ పట్టేసుకుంటారు.

* వేటాడిన సముద్ర జీవుల్ని దగ్గర్లోని టౌనుకు తీసుకెళ్లి అమ్ముకుంటారు. అక్కడి నుంచి బియ్యంలాంటి సరుకులు తెచ్చుకుని సముద్రంలోని ఇళ్లలోనే వండుకుని తింటారు.

* సముద్రపు అలల్ని బట్టి సమయం ఎంతయ్యిందన్న దాన్నీ వీళ్లు పసిగట్టేస్తారట.

* వీళ్ల విచిత్రమైన జీవనాన్ని చూసేందుకు చాలా మంది అక్కడికి వెళుతుంటారు.