ఈ కేకు బంగారం..!

హాయ్‌ ఫ్రెండ్స్‌..! మనకు కేక్స్‌ భలే నచ్చుతాయి కదా..! అమ్మానాన్న అవి కొనిపెడతామంటే చాలు, అల్లరి చేయకుండా బుద్ధిగా ఉంటాం.. ఇప్పటికే మనం చాలా రకాల కేక్స్‌ తినేసి ఉంటాం.. అందులో మీకు ఏ ఫ్లేవర్‌ ఇష్టమంటే.. ఒకరు బటర్‌స్కాచ్‌, మరొకరు ఐస్‌క్రీం, ఇంకొంత మంది రెడ్‌ వెల్‌వేట్‌ అని ఇలా రకరకాలుగా చెబుతారు అంతే కదా..! అయినా ఇప్పుడు ఈ కేక్‌ గోలేంటి అనుకుంటున్నారా?ఎందుకంటే మనం ఓ ప్రత్యేకమైన కేక్‌ గురించి తెలుసుకోబోతున్నాం కాబట్టి.. మరి ఇంకెందుకాలస్యం వెంటనే ఈ కథనం చదివేయండి..!

 మీరు ఎప్పుడైనా బంగారంతో తయారుచేసిన కేక్‌ తిన్నారా..? ఆశ్చర్యంగా ఉంది కదూ బంగారంతో కేక్‌ ఏంటి అనుకుంటున్నారా..? కానీ నిజమే నేస్తాలూ.. ఫ్రాన్స్‌లోని లావ్రే మ్యూజియంలో ఓ వ్యక్తి బంగారంతో కేక్‌లను తయారుచేశాడు. బంగారాన్ని కరిగించి కొన్ని పద్ధతుల ద్వారా దాన్ని తినడానికి వీలుగా మార్చి అప్పుడు కేక్స్‌ని చేశాడట. వాటికి ‘వైల్డ్‌ బెర్రీ క్రిస్టల్‌ మాకరాన్‌ చీజ్‌ కేక్‌’, ‘పాంపాన్‌ వెనిలా కారమెల్‌ గ్రేడ్‌ ఎ కేక్‌’ అని పేర్లు కూడా పెట్టాడు.  

ఒక కారు విలువ..!

బంగారంతో చేశారు కాబట్టి వాటి ధర కచ్చితంగా వేలల్లోనే ఉంటుందనుకుంటే మనం పొరపడినట్లే. ఎందుకంటే.. ఆ కేక్స్‌ కొనే డబ్బులతో ఏకంగా ఒక కారే కొనేయొచ్చట తెలుసా.. ఇందులో వైల్డ్‌ బెర్రీ క్రిస్టల్‌ మాకరాన్‌ చీజ్‌ కేక్‌ ధర అక్షరాల రూ.8.88 లక్షలు. పాంపాన్‌ వెనిలా కారమెల్‌ గ్రేడ్‌ ఎ కేక్‌ వెల రూ.1.25లక్షలు. ఏంటీ ఆశ్చర్యంగా చూస్తున్నారు..? ఇది నిజమే పిల్లలూ.. ధరకు తగ్గట్టుగానే చూడటానికి కూడా చాలా అందంగా ఉండేలా వాటిని తయారుచేశారు. మీకు ఇంకో విషయం తెలుసా ఈ కేక్స్‌ తినడానికి వాటితో పాటుగా స్వచ్ఛమైన బంగారంతో తయారుచేసిన ఫోర్క్‌ స్పూన్‌ కూడా ఇస్తారట.  మరో విషయం ఏంటంటే.. ఇప్పటి వరకు ప్రపంచంలో ఇవే అత్యంత ఖరీదైన కేక్స్‌ అట. వీటిని ఓ వ్యక్తి కొనుగోలు చేసి, అతను తింటున్న వీడియోను సామాజిక మాధ్యమాల్లో పోస్ట్‌ చేశాడు. కొన్ని గంటల్లోనే దానికి లక్షల వ్యూస్‌ వచ్చాయట. ఇది చూసిన నెటిజన్లు.. ‘నిజంగా ఇందంతా నిజమేనా?’ అంటూ కామెంట్లు చేస్తున్నారు. ఎంతైనా.. ఈ కేక్‌ విశేషాలు భలే ఆశ్చర్యంగా ఉన్నాయి కదా నేస్తాలూ..!