Gautam Adani: ‘నీ ముందు సంపద అంతా వెలవెలబోయే’: గౌతమ్‌ అదానీ పోస్టు వైరల్‌

ముంబయి: కుబేరుల్లో ఒకరైన గౌతమ్ అదానీ (Gautam Adani).. నిత్యం వ్యాపార కార్యకలాపాల్లో బిజీగా ఉంటారు. ప్రత్యర్థులకు దీటుగా దూసుకెళ్లేందుకు సరికొత్త వ్యూహాలు రచించడంలో తలమునకలై ఉంటారు. అలాంటి వ్యక్తి తాజాగా ఎక్స్‌ వేదికగా పెట్టిన ఓ పోస్టు ఆకట్టుకుంటోంది.

తన చిట్టి మనవరాలితో దిగిన ఫొటోను పంచుకున్నారు. ఈసందర్భంగా ఆమెపై ఉన్న ప్రేమను వ్యక్తంచేశారు. ‘‘నీ చూపుల్లోని వెలుగు ముందు ప్రపంచంలోని సంపద అంతా వెలవెలబోయే’’ అని రాసుకొచ్చారు. ఆ పాప పేరు కావేరీ. గౌతమ్ అదానీ-ప్రీతి దంపతులకు ఇద్దరు కుమారులు. వారి పేర్లు కరణ్, జీత్‌. ఆ పాప కరణ్‌-పరిధి కుమార్తె.

తొలిసారి చేతులు కలిపిన దిగ్గజాలు.. అదానీ కంపెనీలో రిలయన్స్‌కు వాటా

లండన్‌లోని సైన్స్‌ మ్యూజియంలో న్యూ అదానీ గ్రీన్‌ ఎనర్జీ గ్యాలరీని ఏర్పాటుచేశారు. అక్కడే తనవాళ్ల మధ్యలో ఈ చిత్రాన్ని తీసుకున్నారు. మనవరాళ్లతో ఆడుతుంటే.. తన పని ఒత్తిడి మొత్తం మాయమవుతుందని ఓ సందర్భంలో అదానీ వెల్లడించారు. ‘‘వారితో సమయం గడపడం నాకెంతో ఇష్టం. పని, కుటుంబమే నా ప్రపంచం’’ అని వెల్లడించారు.