డాక్టర్‌ గజిబిజి రాతకు గూగుల్‌ పరిష్కారం!

డాక్టర్‌ రాసిన మందుల చీటీలో రాత అర్థం కావటం లేదా? మందులేంటో తెలియక బుర్ర గోక్కుంటున్నారా? ఇలాంటి ఇబ్బందులు ఇకపై ఉండకపోవచ్చు. డాక్టర్ల గజిబిజి చేతిరాతను విశ్లేషించి, స్పష్టంగా చూపించే ఫీచర్‌ను గూగుల్‌ త్వరలో ప్రవేశ పెట్టనుంది. మనదేశంలో ఏటా నిర్వహించే ‘గూగుల్‌ ఫర్‌ ఇండియా’ కార్యక్రమంలో దీంతో పాటు మరికొన్ని కొత్త ఫీచర్లను ప్రకటించింది.
డాక్టర్ల చేతి రాతను అర్థం చేసుకోవటానికి గూగుల్‌ తీసుకురానున్న కొత్త ఫీచర్‌ కృత్రిమ మేధ, మెషిన్‌ లెర్నింగ్‌ సాయంతో పనిచేస్తుంది. దీన్ని గూగుల్‌ లెన్స్‌ యాప్‌తో వాడుకోవచ్చు. మందుల చీటీని స్మార్ట్‌ఫోన్‌తో ఫొటో తీసి, ఫొటో లైబ్రరీకి అప్‌లోడ్‌ చేస్తే చాలు. వెంటనే గూగుల్‌ లెన్స్‌ యాప్‌ దాన్ని గుర్తించి, డాక్టర్ల రాతను విశ్లేషిస్తుంది. మందుల వివరాలను స్పష్టంగా చూపిస్తుంది. ఈ ఫీచర్‌ అందరికీ ఎప్పుడు అందుబాటులో ఉంటుందనే విషయాన్ని గూగుల్‌ ఇంకా వెల్లడించలేదు. మందుల చీటీలను బాగా అర్థం చేసుకోవటానికి మందుల దుకాణాల వారితో కలిసి పనిచేస్తున్నామని పేర్కొంది. రెండు మూడు వారాల్లో దీనిపై స్పష్టత రావొచ్చు.
* గూగుల్‌ పే యాప్‌ను మరింత సురక్షితంగా మార్చే ఫీచర్లనూ జోడించనున్నట్టు గూగుల్‌ తెలిపింది. చెల్లింపుల్లో ఏవైనా అవకతవకలు, అక్రమాలున్నట్టు ఫ్రాడ్‌ డిటెక్షన్‌ వ్యవస్థ గుర్తించినట్టయితే వెంటనే హెచ్చరించే ఏర్పాటు చేయనుంది.
* ధ్రువీకృత డిజిటల్‌ పత్రాలను తేలికగా యాక్సెస్‌ చేసుకోవటానికి గూగుల్‌ సంస్థ నేషనల్‌ ఇగవర్నెన్స్‌ డివిజన్‌(ఎన్‌ఈజీడీ)తో కలిసి పనిచేస్తోంది కూడా. దీంతో ఆండ్రాయిడ్‌ ఫోన్లలోని ఫైల్స్‌ యాప్‌ నుంచి నేరుగా ఆయా పత్రాలను చూసుకోవచ్చు.
* ఇమేజ్‌, టెక్స్ట్‌ సమాచారాలను రెండింటినీ ఒకేసారి శోధించటానికి మల్టీసెర్చ్‌ ఫీచర్‌నూ ప్రవేశపెట్టనున్నారు. ఇది మనదేశంలో ఇంగ్లిష్‌లో అందుబాటులో ఉంది. వచ్చే సంవత్సరంలో హిందీలో ఆరంభించి, తర్వాత ఇతర భాషలకు విస్తరించనున్నారు.
ః యూట్యూబ్‌ సైతం కొన్ని ఆసక్తికరమైన ఫీచర్లను ప్రకటించింది. ఇందులో ఒకటి కోర్సెస్‌. ఇది పాఠ్య బోధన కోసం ఉద్దేశించిన ఫీచర్‌. సబ్‌స్క్రిప్షన్‌ మోడల్‌లో దీన్ని ఇప్పటికే పరీక్షిస్తోంది. కొంతమంది భాగస్వాములు, కంటెంట్‌ క్రియేటర్లతో కలిసి వచ్చే ఏడాది ఈ ఫీచర్‌ను ఆరంభించనుంది. దీంతో కంటెంట్‌ క్రియేటర్లు పాఠ్య బోధన వీడియోలతో డబ్బు సంపాదించుకోవచ్చు.