Realme: ఎయిర్‌ గెశ్చర్స్‌తో బడ్జెట్‌ ధరలో రియల్‌మీ కొత్త ఫోన్‌

Realme 12X 5G | ఇంటర్నెట్‌డెస్క్‌: ప్రముఖ స్మార్ట్‌ఫోన్ల తయారీ సంస్థ రియల్‌మీ (Realme) 12 సిరీస్‌లో మరో ఫోన్‌ను భారత్‌ మార్కెట్లోకి విడుదల చేసింది. రియల్‌మీ 12ఎక్స్‌ 5జీ (Realme 12X 5G) పేరిట దీన్ని తీసుకొచ్చింది. మూడు వేరియంట్లలో అందుబాటులోకి రానున్న ఈ ఫోన్‌ 5,000mAh, 45W సూపర్‌ వూక్‌ ఫాస్ట్‌ ఛార్జింగ్‌కు సపోర్ట్‌ చేస్తుంది. ఎయిర్‌ గెశ్చర్స్‌ సదుపాయం కూడా ఉంది.

రియల్‌మీ కొత్త ఫోన్‌ మూడు వేరియంట్లలో లభిస్తుంది. 4జీబీ+128జీబీ వేరియంట్‌ ధర రూ.11,999గా కంపెనీ నిర్ణయించింది. 6జీబీ+128జీబీ వేరియంట్‌ ధర రూ.13,499గా, 8జీబీ+128జీబీ వేరియంట్‌ ధర రూ.14,999గా కంపెనీ పేర్కొంది. ట్విలైట్‌ పర్పుల్‌, ఉడ్‌ల్యాండ్‌ గ్రీన్‌ రంగుల్లో లభిస్తుంది. విక్రయాలు ఎప్పటినుంచి ప్రారంభం కానున్నాయనే విషయాన్ని మాత్రం కంపెనీ ప్రకటించలేదు. ఏప్రిల్‌ 2 సాయంత్రం 6 గంటల నుంచి రాత్రి 8 గంటల వరకు ఎర్లీ బర్డ్‌ సేల్‌ అందుబాటులో ఉంటుందని తన వెబ్‌సైట్‌లో తెలిపింది. ఫ్లిప్‌కార్ట్‌తో పాటు రియల్‌మీ వెబ్‌సైట్‌ ద్వారా కొనుగోలు చేయొచ్చని కంపెనీ వెల్లడించింది.

కంపెనీని వీడితే 9 నెలల వేతనం.. ఉచిత కెరీర్‌ కోచింగ్‌: మెకిన్సీ

ఇక స్పెసిఫికేషన్స్‌ విషయానికొస్తే.. ఇందులో 6.72 అంగుళాల ఫుల్‌ హెచ్‌డీ+ ఐపీఎస్‌ ఎల్‌సీడీ డిస్‌ప్లే ఇచ్చారు. ఇది 120Hz రిఫ్రెష్‌ రేటు, 900 నిట్స్‌ పీక్‌ బ్రైట్‌నెస్‌తో వస్తోంది. 6mm మీడియా టెక్‌ డైమెన్‌సిటీ 6100 ప్రాసెసర్‌ను అమర్చారు. ఆండ్రాయిడ్‌ 14 ఆధారిత రియల్‌మీ యూఐ 5.0తో పనిచేస్తుంది. ఇందులో 50 ఎంపీ ప్రధాన కెమెరా, 2 ఎంపీ మైక్రో సెన్సర్‌ ఇచ్చారు. సెల్ఫీ కోసం ముందువైపు 8 ఎంపీ కెమెరాను అమర్చారు. ఎయిర్‌ గెశ్చర్స్‌ ఫీచర్‌ (Air Gestures feature) ఈ ఫోన్‌ సపోర్ట్‌ చేస్తుంది. 3.5mm ఆడియో జాక్‌, 5జీ, వైఫై, జీపీఎస్‌, బ్లూటూత్‌ 5.3, టైప్‌-సి పోర్టు ఉన్నాయి. IP54 రేటింగ్‌తో వస్తుంది.