WhatsApp: ఫేస్‌బుక్ తరహాలో వాట్సప్‌లోనూ కవర్‌ఫొటో

WhatsApp | ఇంటర్నెట్‌ డెస్క్‌: ప్రముఖ మెసేజింగ్‌ యాప్‌ వాట్సప్‌ వినియోగదారులకు మరో కొత్త ఫీచర్‌ను అందుబాటులోకి తీసుకురానుంది. ఫేస్‌బుక్‌, లింక్డన్‌లో మాదిరిగా ప్రొఫైల్ కవర్‌ ఫొటో సెట్‌ చేసుకునే అవకాశం ఇవ్వడానికి సన్నాహాలు చేస్తోంది. ఇప్పటివరకు ఈ సదుపాయం వాట్సప్‌ బిజినెస్‌ అకౌంట్స్‌లో మాత్రమే అందుబాటులో ఉండేది. ఇప్పుడు సాధారణ వినియోగదారులందరికీ ఈ ఫీచర్ ఇవ్వాలని సంస్థ ప్రయత్నిస్తోంది. ప్రొఫైల్ కస్టమైజేషన్‌ను మరింత విస్తరించేందుకు ఈ నిర్ణయం తీసుకున్నట్లు కంపెనీ తెలిపింది. ప్రస్తుతం ఈ ఫీచర్‌ అభివృద్ధి దశలో ఉంది. వినియోగదారులకు అందుబాటులోకి రావడానికి కొంత సమయం పట్టొచ్చని సమాచారం.

ఈ కొత్త ఫీచర్‌తో వినియోగదారులు తమ ప్రొఫైల్ సెట్టింగ్స్‌ నుంచి ఒక ఫొటోను ఎంచుకుని కవర్‌ ఇమేజ్‌గా సెట్ చేసుకోవచ్చని వాబీటా తన బ్లాగ్‌ పోస్ట్‌లో తెలిపింది. ప్రొఫైల్ పేజీ పైభాగంలో ఈ ఫొటో కనిపిస్తుందని పేర్కొంది. ఈ ఫీచర్‌ ఫేస్‌బుక్‌, లింక్డిన్‌ ప్లాట్‌ఫాంల్లో కనిపించే కవర్‌ ఫొటో తరహాలో ఉంటుంది. అలాగే వాట్సప్‌ ఈ ఫీచర్‌కు ప్రత్యేకమైన ప్రైవసీ సెట్టింగ్‌ను కూడా ప్రవేశపెట్టనుంది. దీంతో కవర్ ఫొటోను ఎవరు చూడాలనేది నియంత్రించుకోవచ్చు. ప్రస్తుతం Everyone, My Contacts, Nobody ఆప్షన్లు టెస్టింగ్‌లో ఉన్నాయి. Everyoneను ఎంపిక చేసుకుంటే కవర్ ఫొటోను అందరూ చూడొచ్చు. My Contacts ఆప్షన్‌ ద్వారా మీ ఫోన్లోని కాంటాక్ట్స్‌ మాత్రమే చూడగలరు. Nobody ఎంపిక చేసుకుంటే మీ కవర్‌ ఫొటో మీరు తప్ప ఎవరూ చూడలేరు.