కారులో తిప్పుతూ సామూహిక అత్యాచారం

బెంగళూరులో ఆలస్యంగా వెలుగుచూసిన కీచకపర్వం

బెంగళూరు(యశ్వంతపుర), న్యూస్‌టుడే: ఉద్యానవనంలో స్నేహితుడితో మాట్లాడుతున్న ఓ యువతిని దుండగులు బెదిరించి బలవంతంగా కారులో తీసుకెళ్లి సామూహిక అత్యాచారానికి పాల్పడిన సంఘటన బెంగళూరులో ఆలస్యంగా వెలుగులోకి వచ్చింది. ఈ కేసులో నిందితులు సతీశ్‌, విజయ్‌, శ్రీధర్‌, కిరణ్‌లను పోలీసులు అరెస్టు చేశారు. వారిలో ఇద్దరు ఆఫీస్‌ బాయ్‌లు, ఓ వ్యక్తి కాల్‌సెంటర్‌ ఉద్యోగి, మరోవ్యక్తి ఎలక్ట్రీషియన్‌గా పని చేస్తున్నట్లు పోలీసులు గుర్తించారు. ప్రైవేట్‌ కంపెనీలో పనిచేస్తున్న 19 ఏళ్ల యువతి ఈ నెల 25న రాత్రి 9 గంటల సమయంలో కోరమంగల నేషనల్‌ గేమ్స్‌ పార్క్‌లో స్నేహితుడితో మాట్లాడుతూ కూర్చొంది. నిందితులు అతడిపై దాడి చేసి యువతిని బలవంతంగా లాక్కెళ్లి కారులో పడేశారు. రాత్రి 9 గంటల నుంచి మరుసటి రోజు తెల్లవారుజాము నాలుగింటి వరకు కారులో వివిధ ప్రాంతాల్లో తిప్పుతూ ఆమెపై సామూహిక అత్యాచారానికి పాల్పడినట్లు పోలీసులు శుక్రవారం వెల్లడించారు. తెల్లవారగానే ఆమెను ఇంటి వద్ద వదిలేసి పరారయ్యారు. నిందితులందరూ ఆ యువతికి తెలిసిన వ్యక్తులేనని పోలీసులు వెల్లడించారు. ఉద్యానవనం చుట్టుపక్కల ఉన్న సీసీ కెమెరాల ఆధారంగా నిందితులను అరెస్టు చేశారు.