YSRCP: వైకాపా సామాజిక న్యాయం అంటే ఇదేనా?.. ఫొటో వైరల్‌

ఈనాడు-తిరుపతి: వైకాపా తిరుపతి నియోజకవర్గ సమీక్ష సమావేశంలో బీసీలకు తగిన ప్రాధాన్యం ఇవ్వలేదని పేర్కొంటూ విడుదలైన ఓ ఫొటో వైరల్‌ అవుతోంది. దక్షిణ కోస్తా జిల్లాల పార్టీ ప్రాంతీయ సమన్వయకర్త విజయసాయిరెడ్డి ఆధ్వర్యంలో శుక్ర, శనివారాల్లో జిల్లాలోని నియోజకవర్గాలపై తిరుపతిలో సమీక్ష నిర్వహించారు. ఈ నేపథ్యంలో తిరుపతి నియోజకవర్గానికి సంబంధించి శుక్రవారం సమావేశం జరిగింది.

ఈ సందర్భంగా తిరుపతి ఎమ్మెల్యే భూమన కరుణాకర్‌రెడ్డితోపాటు అతని కుమారుడు డిప్యూటీ మేయర్‌ అభినయ్‌రెడ్డి స్టేజీపైన కూర్చున్నారు. ఇదే సమయంలో నగర మేయర్‌ డాక్టర్‌ శిరీష ఇతర నేతలు, కార్యకర్తలతో కలిసి కింద కూర్చున్నారు. బీసీ సామాజిక వర్గానికి చెందిన మేయర్‌కు వైకాపా ఇచ్చే గౌరవం ఇదేనా అంటూ పలువురు ప్రశ్నిస్తున్నారు. ఇదీ వైకాపాలో సామాజిక న్యాయం అంటే అంటూ కామెంట్లు చేస్తున్నారు.