ఎందుకీ నిర్లిప్తత.. ఓటేద్దాం పదపద

నగరంలో తగ్గుతున్న పోలింగ్‌ శాతం
ఈసారి పెంచేందుకు అవగాహన కార్యక్రమాలు
ఆందోళన కలిగిస్తున్న వేసవి సెలవులు, ఎండలు

ఈనాడు, హైదరాబాద్‌: ప్రతి ఎన్నికల్లో రాజధానిలో పోలింగ్‌ శాతం తగ్గుతుండటం ఆందోళన కలిగిస్తోంది. రకరకాల కారణాలు ఇందుకు దోహదం చేస్తున్నా ఓటర్ల నిర్లిప్తత సైతం దీనికి తోడవుతోంది. 2018 అసెంబ్లీ ఎన్నికలకు 2019 సార్వత్రిక ఎన్నికలకు దాదాపు 4 శాతం పోలింగ్‌ తగ్గిందంటే నగరంలో తీరు అర్థం చేసుకోవచ్చు. మే 13న జరిగే ఎన్నికల్లో పోలింగ్‌ శాతం పెంచడానికి ఈసీ, ఎన్‌జీవోలు ముందుకొచ్చి ప్రజలకు అవగాహన కల్పిస్తున్నాయి.

• హైదరాబాద్‌ పార్లమెంట్‌ నియోజకవర్గం పరిధిలో మరీ తక్కువగా కేవలం 39.49 శాతమే ఓటు వేశారు. ః గత ఎంపీ ఎన్నికల్లో హైదరాబాద్‌, సికింద్రాబాద్‌, మల్కాజిగిరి, చేవెళ్ల పరిధిలో పోలింగ్‌ సగటు 45.26 శాతం నమోదైంది.

ప్రధాన కారణాలు ఇవే...

• ఏటా 4-5 లక్షల మంది ఉపాధి, ఉద్యోగాల నిమిత్తం హైదరాబాద్‌కు వలస వస్తుంటారు. స్థానిక అవసరాల కోసం ఇక్కడ ఓటు హక్కు పొందుతుంటారు. ఇందులో చాలామందికి సొంతూరిలోనూ ఓటు ఉంటుంది. ఎన్నికలప్పుడు స్వగ్రామాలకు వెళ్లడానికే మొగ్గు చూపుతుంటారు.
• వేసవి సెలవుల్లో ఎన్నికల కారణంగా చాలామంది పిల్లాపాపలతో సొంతూళ్లకు పయనమవుతుంటారు. ఈసారీ అదే పరిస్థితి ఉంది. దీంతో ఇక్కడ ఓటు హక్కు ఉన్నా వినియోగించుకోలేని పరిస్థితి.
• అద్దె ఇళ్లలో ఉన్న వారు తరచూ మారుతుండటం సాధారణమే. కొత్త ప్రాంతానికి వెళ్లినప్పుడు అక్కడా కొత్తగా ఓటు హక్కు పొందుతుంటారు. ఇలా రెండుచోట్ల ఓటు ఉంటుంది. గతంలో ఉన్న ఓటును రద్దు చేసుకోకపోవడంతో అది చెలామణిలోనే ఉంటుంది.
• ఈసారి ఎండలు ఆందోళన కలిగిస్తున్నాయి. వేడితో జనం బయటకు వచ్చి వరుసలో నిలబడి ఓటేసేందుకు వస్తారో లేదోననే సందేహాలు ఉన్నాయి. ముఖ్యంగా వృద్ధులు, వికలాంగులకు పోలింగ్‌ బూత్‌ వరకు తీసుకెళ్లే ఏర్పాట్లు చేయాలని నిపుణులు సూచిస్తున్నారు.