మోదీ హయాంలో ముస్లింలను అనుమానిస్తున్నారు

మాట్లాడుతున్న ఎంపీ అసదుద్దీన్‌ ఒవైసీ

గోల్కొండ, న్యూస్‌టుడే: దేశంలో నేడు ముస్లింలను అనుమానపు దృష్టితో చూస్తున్నారని, అలాంటి పరిస్థితిని ప్రధాని మోదీ తీసుకొచ్చారని మజ్లిస్‌ హైదరాబాద్‌ అభ్యర్థి, ఎంపీ అసదుద్దీన్‌ ఒవైసీ అన్నారు. సోమవారం రాత్రి టోలిచౌకి ఎండీలైన్స్‌లో జరిగిన బహిరంగ సభలో ఆయన మాట్లాడారు. కర్ణాటకలో జేడీఎస్‌కు చెందిన ప్రజ్వల్‌ రేవణ్న అనే వ్యక్తి మహిళలపై రెండు వేల అసభ్యకర వీడియోలు చేశారని, అతనికి మద్దతుగా మోదీ ఎన్నికల ప్రచారం చేశారన్నారు. నారీశక్తి అని పదేపదే పలికే ప్రధాని నారీమణులను అవమానించిన వారి పక్షాన నిలబడటం ఏంటని ప్రశ్నించారు. భాజపా కేంద్రంలో మరోసారి అధికారంలోకి వస్తే ఎస్సీ, ఎస్టీ, ఓబీసీ రిజర్వేషన్లను ఎత్తేస్తుందని ఆందోళన వ్యక్తం చేశారు. వక్ఫ్‌ చట్టాన్ని తొలగిస్తామంటున్నారని, మతతత్వశక్తులకు వ్యతిరేకంగా ప్రజలు ఓటు వేయాలని కోరారు. సమావేశంలో కార్వాన్‌ ఎమ్మెల్యే కౌసర్‌ మొహియుద్దీన్‌ పాల్గొన్నారు.