రీల్స్‌ చేద్దామని పిలిచి.. కాబోయే వాడిని కత్తితో పొడిచేసింది..!

హావేరి, న్యూస్‌టుడే : తాను ప్రేమిస్తున్న యువకుడ్ని వదిలి మరో యువకునితో వివాహం చేసుకోవడానికి ఆ బాలిక (17)కు ఇష్టమే లేదు. తనకు ఇష్టం లేకపోయినా, కుటుంబ సభ్యుల ఒత్తిడితో దేవేంద్ర గౌడ (23) అనే యువకుడితో వివాహ నిశ్చితార్థానాకి తలవంచక తప్పలేదు. ఎలాగైనా అతన్ని అడ్డు తప్పించుకునేందుకు ఎత్తుగడ వేసింది. ‘మీరు ఉద్యానానికి వస్తే రీల్స్‌ తీసుకుందాం’ అని గౌడను నమ్మించింది. కొంత సమయం రీల్స్‌ తీసిన తర్వాత- చేతులు కట్టేసి, మరో రీల్‌ తీస్తానని చెప్పింది. ఆమె మాటలు దేవేంద్రగౌడ నమ్మాడు. చేతులు కట్టేసిన తర్వాత తన వద్ద ఉన్న కత్తితో అతని గొంతుపై పొడిచి పరారైంది. బాధతో కేకలు వేస్తున్న అతన్ని చికిత్స కోసం స్థానిక ఆసుపత్రిలో చేర్పించారు. బాలికను అదుపులోకి తీసుకున్నామని హలగేరి ఠాణా పోలీసులు శనివారం వెల్లడించారు. బాధితుడు హరపనహళ్లిలో సేల్స్‌మెన్‌గా పని చేస్తున్నాడని పోలీసులు తెలిపారు. బాలిక మేజర్‌ అయిన తర్వాత వివాహం చేసుకునేలా ఆమె తల్లిదండ్రులు దేవేంద్రగౌడతో మార్చి 3న నిశ్చితార్థం చేశారు.