తక్కువ నీటితో అధిక దిగుబడులు

గాలిపాలెంలో బిందుసేద్య పరికరాల అమరికను తనిఖీ చేస్తున్న ఏపీఎంఐపీ పీడీ బి.శ్రీనివాసులు

చేజర్ల, న్యూస్‌టుడే: తక్కువ నీటితో ఎక్కువ నేలలో సాగు చేయడంతో పాటు అధిక దిగుబడులు సాధించేందుకు రైతులు సూక్ష్మ నీటిపారుదల వ్యవస్థ ఏర్పాటు చేసుకోవాలని ఏపీఎంఐపీ పథక సంచాలకులు శ్రీనివాసులు సూచించారు. మండలంలోని గాలిపాలెంలో నిమ్మతోటలకు అమర్చిన బిందు, సేద్య పరికరాలను గురువారం పరిశీలించారు. అనంతరం ఆయన మాట్లాడుతూ ఈ ఏడాది జిల్లాలో 3500 ఎకరాలకు బిందు, తుంపర సేద్య పరికరాలను అందజేయనున్నట్లు వివరించారు. బిందు సేద్యానికి 90 శాతం, తుంపర సేద్యానికి 50 శాతం రాయితీ ఉంటుందని పేర్కొన్నారు. గతేడాది లక్ష్యం కన్నా 20 శాతం అధికంగా పరికరాలు అందజేసినట్లు వివరించారు. అవసరమైన రైతులు రైతు భరోసా కేంద్రాలకు వెళ్లి దరఖాస్తు చేసుకోవాలని సూచించారు. ఏపీఎంఐపీ సిబ్బంది, పంపిణీ సంస్థల ప్రతినిధులు పాల్గొన్నారు.