హతవిధీ..పట్టించుకునేవారేరీ!

నెెల్లూరు(నగరపాలకసంస్థ), న్యూస్‌టుడే: నెల్లూరు నగరంలోని ప్రసిద్ధ బారా షహీద్‌ దర్గా పాలకులు, అధికారుల నిర్లక్ష్యానికి గురవుతోంది. గత తెదేపా ప్రభుత్వ హయాంలో రొట్టెల పండగను రాష్ట్ర పండగగా గుర్తించి సుమారు రూ. 8 కోట్ల వరకు ఖర్చు చేసి అభివృద్ధి చేయగా.. అనంతరం అధికారంలోకి వచ్చిన వైకాపా ప్రభుత్వం మాటలే తప్ప.. చేతల్లో ప్రగతిని చూపలేకపోయింది. దర్గా టెండరు నగదు సుమారు రూ. కోటికిపైగా తీసుకువెళ్లే వక్ఫ్‌బోర్డు అధికారులు తమకేమీ పట్టనట్లు వ్యవహరిస్తుండగా- దర్గా వక్ఫ్‌బోర్డు పరిధిలోకి వస్తుందని.. తమకేమీ సంబంధం లేదని నగరపాలక సంస్థ అధికారులు పట్టించుకోవడం లేదు. ఫలితంగా స్వర్ణాల చెరువు ఘాట్‌ కళా విహీనంగా తయారైంది. ఘాట్‌ పొడవునా వ్యర్థాలే దర్శనమిస్తుండగా.. కనీసం వాటిని శుభ్రం చేసేవారే కరవయ్యారు. దర్గా ఆవరణలోని పార్కు సైతం నిరుపయోగంగా మారింది. అందులోని పరికరాలు ఎందుకూ కొరగాకుండా పోయాయి. ఈ మొత్తం పరిణామాలు.. భక్తులకు ఇబ్బందికరంగా మారాయి. రొట్టెల పండగ సమయంలో హడావుడి చేసే అధికారులు, ప్రజాప్రతినిధులు.. ఆ తర్వాత పట్టించుకోకపోవడం షరామామూలుగా మారిందని భక్తులు అసంతృప్తి వ్యక్తం చేస్తున్నారు.