ముమ్మరంగా నామినేషన్ల దాఖలు

ఎన్నికల తేదీలు దగ్గర పడుతున్న వేళ వివిధ పార్టీల నేతలు నామినేషన్లను దాఖలు చేస్తున్నారు. అనుచరులు, నేతలు, కార్యకర్తలతో కలిసి ర్యాలీలు నిర్వహిస్తూ వెళ్లి తమ ఇష్టదైవాలకు ప్రార్థనలు చేసి తర్వాత నామినేషన్లు దాఖలు చేస్తున్నారు. ముహూర్త బలం నిర్ణయించుకొని కొంత సమయం వేచి ఉండైనా సరిగ్గా అదే సమయానికి ప్రక్రియ పూర్తి చేస్తున్నారు. మంగళవారం ప్రధాన పార్టీలకు చెందిన అభ్యర్థులతోపాటు కొందరు స్వతంత్రులు కూడా తమ నామపత్రాలు సంబంధిత అధికారులకు అందించారు.

న్యూస్‌టుడే, బృందం

రాయగడ విధానసభ నియోజకవర్గం బిజద అభ్యర్థిని అనుసూయ మాఝి నామినేషన్‌ దాఖలు చేశారు. మంగళవారం జగన్నాథ మందిరం నుంచి పార్టీ జిల్లా అధ్యక్షుడు నెక్కంటి భాస్కరరావు, జిల్లా ఇన్‌ఛార్జి కృష్ణ మహాపాత్ర్‌,  జగదీష్‌ పాత్ర్‌, మాజీ మంత్రి లాల్‌బిహారీ హిమిరిక పాల్గొన్నారు.

రాయగడ జిల్లా బిసంకటక్‌ అసెంబ్లీ బిజద అభ్యర్థి జగన్నాథ సరక భారీ ర్యాలీగా వెళ్లి అదనపు కలెక్టర్‌ భాస్కర్‌ చంద్ర రైత్‌కు నామినేషన్‌ పత్రం అందజేశారు

ప్రముఖ ఓలీవుడ్‌ హీరో, గంజాం జిల్లా దిగపొహండి అసెంబ్లీ నియోజకవర్గం భాజపా అభ్యర్థి సిద్ధాంత్‌ మహాపాత్ర్‌ మంగళవారం నామినేషన్‌ దాఖలు చేశారు. మధ్యాహ్నం భాజపా నాయకులు, కార్యకర్తలతో కలిసి ఆయన ర్యాలీగా బ్రహ్మపుర సబ్‌కలెక్టరు కార్యాలయం చేరుకుని రిటర్నింగ్‌ అధికారికి నామినేషన్‌ పత్రాలు అందించారు.

రాయగడ జిల్లా గుణుపురం విధానసభ నియోజకవర్గంలో మంగళవారం కాంగ్రెసు అభ్యర్థి సత్యజిత్‌ గమాంగ్‌, స్వతంత్ర అభ్యర్థి ఫాల్గుని సబర నామినేషన్‌ పత్రాలు ఎన్నికల అధికారి, సబ్‌కలెక్టరు కిరణ్‌దీప్‌ కౌర్‌ సహొతాకు అందజేశారు.