కూటమి ప్రభుత్వంతోనే అభివృద్ధి

కశింకోటలో ట్రాక్టరు నడుపుతున్న కూటమి అభ్యర్థి కొణతాల

కశింకోట, లక్ష్మీదేవిపేట (అనకాపల్లి), న్యూస్‌టుడే: కూటమి ప్రభుత్వం అధికారంలోకి వస్తేనే అన్ని ప్రాంతాలు అభివృద్ధి చెందుతాయని జనసేన ఎమ్మెల్యే అభ్యర్థి కొణతాల రామకృష్ణ పేర్కొన్నారు. పట్టణంలోని గవరపాలెంలో ఆదివారం పీలా సోమేశ్‌నాయుడు వీధి, శంకర్‌ థియేటర్‌ రహదారి, గౌరీ సంఘం వీధి తదితర ప్రాంతాల్లో బుల్లితెర నటుడు జెమిని సురేశ్‌తో కలిసి ఇంటింటా ప్రచారం నిర్వహించారు. మహిళలు హారతులు పట్టి ఘన స్వాగతం పలికారు. మహిళలు స్థానికంగా ఎదుర్కొంటున్న సమస్యలను ప్రస్తావించగా అధికారంలోకి రాగానే పరిష్కరిస్తానని భరోసా ఇచ్చారు. అనంతరం కశింకోటలో రైతులతో సమావేశమయ్యారు. వైకాపా ప్రభుత్వం రైతులకు అన్యాయం చేసిందన్నారు. చెరకు రైతులకు న్యాయం జరిగేలా గిట్టుబాటు ధర కల్పిస్తామని హామీ ఇచ్చారు. రైతులతో మమేకమై ట్రాక్టరు నడిపారు. గాజు గ్లాసు గుర్తుపై ఓటు వేసి ఎమ్మెల్యే అభ్యర్థిగా తనను, కమలం గుర్తుపై ఓటు వేసి ఎంపీ అభ్యర్థిగా సీఎం రమేశ్‌ను అత్యధిక మెజార్టీతో గెలిపించాలని అభ్యర్థించారు. సీఎం రుత్విక్‌, కూటమి నాయకులు బొడ్డేడ బాలాజీ,  ఆదర్శ రైతు ఆళ్ల అప్పలనాయుడు, కూటమి నాయకులు పాల్గొన్నారు.