Nagarjuna: దేవుడే రాసిన కావ్యమిది

‘నా సామిరంగ’తో సంక్రాంతి బరిలో సందడి చేయనున్నారు నాగార్జున. ఆయన హీరోగా నటించిన ఈ చిత్రాన్ని నృత్యదర్శకుడు విజయ్‌ బిన్ని తెరకెక్కించారు. శ్రీనివాసా చిట్టూరి నిర్మాత. ఆషికా రంగనాథ్‌ కథానాయిక. అల్లరి నరేశ్‌, రాజ్‌తరుణ్‌ కీలక పాత్రలు పోషించారు. ఈ సినిమా ఈ నెల 14న విడుదల కానున్న నేపథ్యంలో ప్రచార కార్యక్రమాల జోరు పెంచారు. ఇందులో భాగంగా శుక్రవారం ఈ చిత్రం నుంచి ‘‘దేవుడే తన చేతితో రాసిన ఒక కావ్యం.. అంజిది కృష్టయ్యది విడదియ్యని ఒక బంధం’’ అనే పాటను విడుదల చేశారు. సినిమాలోని నాగ్‌ - అల్లరి నరేశ్‌ల పాత్రల మధ్య ఉన్న స్నేహ బంధాన్ని చూపిస్తూ సాగే పాటిది. దీనికి ఎం.ఎం.కీరవాణి స్వరాలు సమకూర్చడమే కాక స్వయంగా సాహిత్యమందించారు. శాండిల్య ఆలపించారు. ఈ పాటలో నాగ్‌, నరేశ్‌ల మధ్య స్నేహాన్ని మనసులకు హత్తుకునేలా చూపించారు. పీరియాడిక్‌ మాస్‌ యాక్షన్‌ ఎంటర్‌టైనర్‌గా రూపొందిన ఈ చిత్రానికి ప్రసన్న కుమార్‌ బెజవాడ కథ, మాటలు అందించారు. శివేంద్ర దాశరధి ఛాయాగ్రాహకుడిగా వ్యవహరించారు.