Chandrababu: ఏపీలో దళిత వ్యతిరేక ప్రభుత్వం: చంద్రబాబు

గుడివాడ: రాష్ట్రంలో దళిత వ్యతిరేక ప్రభుత్వ పాలన సాగుతోందని తెదేపా అధినేత చంద్రబాబు విమర్శించారు. కృష్ణా జిల్లా గుడివాడలో నిర్వహించిన అంబేడ్కర్‌ జయంతి కార్యక్రమంలో ఆయన మాట్లాడారు. అంబేడ్కర్‌కు నిజమైన వారసుడు ఎన్టీఆరేనని చెప్పారు. 

వైకాపా పాలనలో గతంలో ఎన్నడూ లేనివిధంగా ఎస్సీలపై దాడులు జరుగుతున్నాయని ఆరోపించారు. సీఎం జగన్‌ పాపాలు పరాకాష్ఠకు చేరాయన్నారు. దళిత వైద్యాధికారి అచ్చెన్న చనిపోతే సీఎం నోరు మెదపలేదని మండిపడ్డారు. తెదేపా పాలనలో దళితుల అభ్యున్నతికి కృషి చేశామని ఆయన చెప్పారు. కేఆర్‌ నారాయణన్‌ను రాష్ట్రపతిగా ప్రతిపాదించి గెలిపించింది తెదేపానేనని తెలిపారు. దళిత నేత జీఎంసీ బాలయోగిని లోక్‌సభ స్పీకర్‌ను చేశామని చంద్రబాబు గుర్తుచేశారు. 

అనంతరం స్థానిక తెదేపా నేత వెనిగండ్ల రాము ఆధ్వర్యంలో నిర్వహించిన పాస్టర్ల సమావేశంలో చంద్రబాబు పాల్గొన్నారు. ఈ సందర్భంగా ఆయన మాట్లాడుతూ.. సేవాభావంతో క్రైస్తవ సంఘాలు పనిచేస్తున్నాయని కొనియాడారు. సీఎం జగన్‌ బాధ్యతను విస్మరించి దోపిడీనే లక్ష్యంగా పెట్టుకున్నారని ఆరోపించారు. పేదరిక నిర్మూలనకు క్రైస్తవ సంఘాలు కృషి చేస్తున్నాయని.. తెదేపాతో కలిసి పనిచేస్తే ఆర్థిక అసమానతలను తొలగించవచ్చని చెప్పారు. తెదేపా హయాంలో దేవాలయాలు, చర్చిలు, మసీదులపై దాడులు జరిగితే తీవ్రంగా పరిగణించి చర్యలు తీసుకున్నామని చంద్రబాబు తెలిపారు.