Gudivada Amarnath: గాజువాకలో అమర్‌నాథ్‌కు ఝలక్‌

తొలి ఆత్మీయ సమావేశానికి ఎమ్మెల్యే, కార్పొరేటర్ల డుమ్మా

విశాఖపట్నం (గాజువాక), న్యూస్‌టుడే: విశాఖ జిల్లా గాజువాక వైకాపా అభ్యర్థిగా బరిలో నిలుస్తున్న మంత్రి అమర్‌నాథ్‌కు పార్టీశ్రేణుల నుంచి వ్యతిరేకత వ్యక్తమవుతోంది. ఆదివారం ఆయన గాజువాకలో తొలిసారిగా పార్టీశ్రేణులతో ఆత్మీయ సమావేశం ఏర్పాటు చేశారు. సమావేశానికి ప్రస్తుత ఎమ్మెల్యే తిప్పల నాగిరెడ్డి, ఇటీవల వరకు ఇన్‌ఛార్జిగా పని చేసిన కార్పొరేటరు ఉరుకూటి రామచంద్రరావు(చందు), మరికొందరు గైర్హాజరయ్యారు. కార్యక్రమానికి హాజరైన 73వ వార్డు కార్పొరేటరు భూపతిరాజు సుజాత, డీసీఎంఎస్‌ మాజీ ఛైర్‌పర్సన్‌ పల్లా చినతల్లి, ఇతర నాయకులు, కార్యకర్తలు వివిధ అంశాలపై మంత్రి అమర్‌నాథ్‌ను నిలదీశారు. పార్టీ ఆదేశాల మేరకు అందరూ సహకరించాలంటూ మంత్రి తన ప్రసంగం ముగించారు. మంత్రి అమర్‌నాథ్‌ను గాజువాక అభ్యర్థిగా ఎంపిక చేసినప్పట్నుంచి పార్టీలో విభేదాలు తారస్థాయికి చేరాయి. ఇన్‌ఛార్జి పదవి నుంచి తొలగించడంతో ఉరుకూటి చందు అసంతృప్తితో ఉన్నారు. ఎమ్మెల్యే నాగిరెడ్డి తనకు అనారోగ్యంగా ఉందంటూ ముఖం చాటేశారు. తొలినుంచీ గాజువాక ఇన్‌ఛార్జిగా పనిచేసిన ఎమ్మెల్యే తనయుడు తిప్పల దేవన్‌రెడ్డిని తప్పించడంతో ఆయన పార్టీ కార్యక్రమాలకు దూరంగా ఉన్నారు. అయితే ఆదివారం ఆయన మంత్రి సమావేశానికి హాజరై, అధ్యక్షత కూడా వహించారు. మాజీ ఎమ్మెల్యేలు తిప్పల గురుమూర్తిరెడ్డి, చింతలపూడి వెంకట్రామయ్య పాల్గొన్నారు.