Shashi Tharoor: భాజపాకు 50 సీట్లు తగ్గొచ్చు.. విపక్షాల గురించి ఆ మాట చెప్పడం కష్టమే..!

కొళికోడ్‌: వచ్చే సార్వత్రిక ఎన్నికల్లో భారతీయ జనతా పార్టీ (BJP) 2019లో సాధించిన విజయాన్ని పునరావృతం చేయడం అసాధ్యమేనని కాంగ్రెస్(Congress) సీనియర్ నేత శశిథరూర్( Shashi Tharoor) అన్నారు. గతంతో పోలిస్తే 50 సీట్లను కోల్పోవచ్చని అంచనా వేశారు. కేరళలో జరిగిన ఓ కార్యక్రమంలో మాట్లాడుతూ ఈ అభిప్రాయం వ్యక్తం చేశారు.

‘2019లో భాజపా సాధించిన విజయం.. 2024లో పునరావృతం కాకపోవచ్చు. అలాగే వచ్చే ఎన్నికల్లో మెజార్టీ మార్కుకంటే దిగువకు పడిపోవడం కూడా అసాధ్యమేమీ కాదు’ అని థరూర్ వ్యాఖ్యానించారు. అలాగే పుల్వామా, బాలాకోట్ దాడులు చివరి నిమిషంలో ప్రభావం చూపాయని, రానున్న ఎన్నికల్లో ఇలాంటివి రిపీట్ కావని వెల్లడించారు. కమలం పార్టీ 50 సీట్లు కోల్పోవడమనేది ఊహించదగినదే అని అన్నారు. అది ప్రతిపక్షాలకు లాభదాయకంగా మారొచ్చన్నారు. అయితే ఆ సమయంలో విపక్షపార్టీలు కలిసికట్టుగా ముందుకు సాగుతాయా..? అనేది చెప్పడం కష్టమేనని అభిప్రాయపడ్డారు.  2019 ఎన్నికల్లో భాజపా మూడు వందలకు పైగా సీట్లు దక్కించుకుంది.

అలాగే ఆయన వారసత్వ రాజకీయాలపైనా స్పందించారు. ‘మనం కాంగ్రెస్ వారసత్వ రాజకీయాల గురించి మాట్లాడేప్పుడు.. దేశం మొత్తం ఉన్న రాజకీయపార్టీల గురించి కూడా గమనించాలి. ములాయం సింగ్ యాదవ్, లాలూ ప్రసాద్ యాదవ్, కరుణానిధి, బాల్‌ ఠాక్రే, శరద్ పవార్ పార్టీల్లో వారి తర్వాతి తరం రాజకీయాల్లో ఉంది’ అని వెల్లడించారు.