AP News:  అమర్‌నాథ్‌రెడ్డి, నానిని అదుపులోకి తీసుకున్న పోలీసులు 

చిత్తూరు: తెదేపా నేతలు అమర్‌నాథ్‌రెడ్డి, పులివర్తి నానిని పోలీసులు అదుపులోకి తీసుకున్నారు. కుప్పం బీసీఎన్‌ హోటల్‌లో బసచేసిన అమర్‌నాథ్‌రెడ్డి, నానిని పోలీసులు మంగళవారం రాత్రి అరెస్టు చేశారు. సోమవారం(నిన్న) కుప్పం మున్సిపాలిటీ కార్యాలయంపై దాడి చేశారని పోలీసులు కేసు నమోదు చేశారు. దీంతో మొత్తం 19 మంది తెదేపా నేతలపై పోలీసులు కేసు నమోదు చేశారు.  

ఏం జరిగిందంటే.. 

కుప్పం మున్సిపాలిటీ ఎన్నికలకు సంబంధించి 14వ వార్డులో పోటీ లేనట్లు కమిషనర్‌ చిట్టిబాబు ఇచ్చిన జాబితా ఉండడంతో, ఇలా ఎందుకు జరిగిందో తెలుసుకోవాలని తెదేపా శ్రేణులు ఆయన కార్యాలయానికి చేరుకున్నారు. ఎంతసేపటికీ కమిషనర్‌ నుంచి సమాధానం రాకపోవడంతో ఒకానొక దశలో వారు గేటును తోసుకుంటూ కార్యాలయ ఆవరణలోకి చేరుకున్నారు. దీంతో పోలీసులు, తెదేపా శ్రేణుల మధ్య తొపులాట జరిగింది. కొందరు నాయకులపై పోలీసులు చేయి చేసుకున్నారు. పోలీసులు తెదేపా నేత అమర్‌నాథ్‌రెడ్డి మెడ పట్టుకొని బయటకు తోశారు. అనంతరం తెదేపా శ్రేణులు రోడ్డుపై బైఠాయించారు.