TS News: హిట్లర్‌ పుస్తకాలు చదివి నియంతలా మారారు: కోదండరాం

సీఎం కేసీఆర్‌పై ధ్వజం

కవాడిగూడ, న్యూస్‌టుడే: హిట్లర్‌ పుస్తకాలు చదివి ముఖ్యమంత్రి కేసీఆర్‌ నియంతలా మారారని తెజస అధ్యక్షుడు ఆచార్య కోదండరాం విమర్శించారు. విద్యారంగ, ఉపాధ్యాయుల సమస్యలు పరిష్కరించాలని డిమాండ్‌ చేస్తూ మంగళవారం హైదరాబాద్‌ ధర్నాచౌక్‌లో డెమోక్రటిక్‌ టీచర్స్‌ ఫెడరేషన్‌(డీటీఎఫ్‌) ఆధ్వర్యంలో ఉపాధ్యాయులు ధర్నా చేశారు. దీనికి హాజరైన ఆయన మాట్లాడుతూ.. రాష్ట్రంలో అప్రజాస్వామిక పాలన కొనసాగుతోందన్నారు.  ఉపాధ్యాయ ఖాళీలు భర్తీ చేయాలని, స్వచ్ఛ కార్మికులను నియమించాలని డిమాండ్‌ చేశారు. తెలంగాణ విద్యా పరిరక్షణ కమిటీ రాష్ట్ర ప్రధాన కార్యదర్శి ఆచార్య హరగోపాల్‌ మాట్లాడుతూ.. తెరాస ప్రభుత్వం విద్య, వైద్య రంగాలను ప్రైవేటు దోపిడీకి వదిలేసిందని ఆరోపించారు. డీటీఎఫ్‌ రాష్ట్ర అధ్యక్షుడు ఎం.రఘుశంకర్‌రెడ్డి అధ్యక్షతన జరిగిన ధర్నాలో సీపీఐ(ఎంఎల్‌) న్యూడెమోక్రసీ రాష్ట్ర కార్యదర్శి సాధినేని వెంకటేశ్వర్‌రావు, సీపీఐ రాష్ట్ర కార్యదర్శివర్గ సభ్యుడు బాలమల్లేశ్‌, ప్రొ.లక్ష్మణ్‌, విరసం నేత రాంకీ, డీటీఎఫ్‌ రాష్ట్ర ప్రధాన కార్యదర్శి లింగారెడ్డి, నాయకుడు రాఘవాచారి తదితరులు పాల్గొన్నారు.