Chennai vs Hyderabad: హైదరాబాద్‌కు ఘోర పరాభవం.. సొంతగడ్డపై అదరగొట్టిన చెన్నై

చెన్నై: చెపాక్‌లో చెన్నై జట్టు అదరగొట్టింది. హైదరాబాద్‌తో జరిగిన పోరులో ఆ జట్టు 78 పరుగుల తేడాతో ఘన విజయం సాధించింది. 213 పరుగుల లక్ష్యంతో బ్యాటింగ్‌ చేసిన హైదరాబాద్‌ 18.5 ఓవర్లలో 134 పరుగులకే ఆలౌట్‌ అయింది. ఆ జట్టులో మార్‌క్రమ్‌ (32; 26 బంతుల్లో 4 ఫోర్లు) టాప్‌ స్కోరర్‌. ట్రావిస్‌ హెడ్‌ (13), అభిషేక్‌ శర్మ (15), అన్మోల్‌ప్రీత్‌సింగ్‌ (0), నితీశ్‌ రెడ్డి (15), క్లాసెన్‌ (20) సమద్‌ (19) తీవ్ర నిరాశ పరిచారు. చెన్నై బౌలర్‌ తుషార్‌ దేశ్‌పాండే (4/22) టాపార్డర్‌ను దెబ్బతీశాడు. పతిరన, ముస్తాఫిజుర్‌ చెరో రెండు వికెట్లు తీయగా, జడేజా, శార్దూల్‌ ఠాకూర్‌ ఒక్కో వికెట్‌ పడగొట్టారు. 

అంతకుముందు టాస్‌ ఓడి తొలుత బ్యాటింగ్ చేసిన  నిర్ణీత 20 ఓవర్లలో 3 వికెట్ల నష్టానికి 212 పరుగులు చేసింది. రుతురాజ్ గైక్వాడ్ (98; 54 బంతుల్లో 10 ఫోర్లు, 3 సిక్స్‌లు) త్రుటిలో శతకం చేజార్చుకున్నాడు. డారిల్ మిచెల్ (52; 32 బంతుల్లో 7 ఫోర్లు, 1 సిక్స్‌) అర్ధ శతకం బాదాడు. శివమ్‌ దూబె (39*; 20 బంతుల్లో 1 ఫోర్, 4 సిక్స్‌లు) మెరుపులు మెరిపించాడు. ఆఖరి ఓవర్‌లో బ్యాటింగ్‌కు వచ్చిన ధోనీ (5*; 2 బంతుల్లో) ఒక ఫోర్ బాదాడు. హైదరాబాద్‌ బౌలర్లలో భువనేశ్వర్‌ కుమార్‌, నటరాజన్, జయ్‌దేవ్ ఉనద్కత్ తలో వికెట్ పడగొట్టారు.

మ్యాచ్‌ విశేషాలు

• త్రుటిలో సెంచరీ మిస్ చేసుకున్న రుతురాజ్ గైక్వాడ్ ప్లేయర్ ఆఫ్‌ది మ్యాచ్‌గా నిలిచాడు. 

• ఈ మ్యాచ్‌లో చెన్నై ఆటగాడు డారిల్ మిచెల్ ఐదు క్యాచ్‌లు అందుకున్నాడు. అతనికంటే ముందు మహ్మద్‌ నబీ (2021) మాత్రమే ఐపీఎల్‌లో ఈ ఘనత సాధించాడు.
• ఐపీఎల్‌లో ఆటగాడిగా ధోనీకిది 150వ విజయం. ఈ రికార్డు సాధించిన తొలి ఆటగాడు కూడా ధోనీనే. 
• చెపాక్‌ స్టేడియంలో చెన్నైకిది 50వ విజయం.