IND vs WI: ఏడేళ్ల తర్వాత పోయింది సిరీస్‌

చివరి టీ20లో భారత్‌ పరాజయం
3-2తో నెగ్గిన వెస్టిండీస్‌
మెరిసిన కింగ్‌, పూరన్‌

ప్చ్‌ నిరాశే. వరుసగా రెండు మ్యాచ్‌ల్లో గెలిచి పుంజుకున్నట్లే కనిపించిన టీమ్‌ఇండియా భంగపడింది. విండీస్‌తో చివరి టీ20లో ఓడి సిరీస్‌ను 2-3తో కోల్పోయింది. గత మ్యాచ్‌లో పరుగుల వరద పారించిన అదే వేదికలో భారత్‌ తగినంత స్కోరు చేయలేకపోగా.. బ్రెండన్‌ కింగ్‌, పూరన్‌ మెరుపులతో కరీబియన్‌ జట్టు అలవోకగా లక్ష్యాన్ని ఛేదించింది. సూర్యకుమార్‌ అర్ధశతకం వృథా అయింది. 2016 తర్వాత ఓ ద్వైపాక్షిక టీ20 సిరీస్‌లో విండీస్‌ చేతిలో ఓడిపోవడం భారత్‌కు ఇదే తొలిసారి కావడం గమనార్హం.

లాడర్‌హిల్‌: బ్యాటింగ్‌లో దూకుడు కొరవడడంతో వెస్టిండీస్‌తో చివరిదైన అయిదో టీ20లో టీమ్‌ఇండియా 8 వికెట్ల తేడాతో ఓడిపోయింది. ఆదివారం మొదట భారత్‌ 9 వికెట్లకు 165 పరుగులు చేసింది. సూర్యకుమార్‌ (61; 45 బంతుల్లో 4×4, 3×6) టాప్‌ స్కోరర్‌. రొమారియో షెఫర్డ్‌ (4/31), అకీల్‌ హోసీన్‌ (2/24) భారత్‌ను కట్టడి చేశారు. బ్రెండన్‌ కింగ్‌ (85 నాటౌట్‌; 55 బంతుల్లో 5×4, 6×6), పూరన్‌ (47; 35 బంతుల్లో 1×4, 4×6) మెరవడంలో లక్ష్యాన్ని వెస్టిండీస్‌ 18 ఓవర్లలో 2 వికెట్లు కోల్పోయి అలవోకగా ఛేదించింది. హార్దిక్‌ పాండ్య సారథ్యంలో భారత్‌ టీ20 సిరీస్‌ను కోల్పోవడం ఇదే తొలిసారి. అతడి నేతృత్వంలో భారత్‌ ఇంతకుముందు నాలుగు సిరీస్‌లు గెలుచుకుంది.

అలవోకగా ఛేదించారు: వెస్టిండీస్‌ ఛేదనలో రెండో ఓవర్లోనే మేయర్స్‌ (10)ను అర్ష్‌దీప్‌ ఔట్‌ చేయడంతో భారత్‌ సంబరడిపోయింది. కానీ కింగ్‌కు తోడైన పూరన్‌.. ఆ ఆనందాన్ని ఎంతోసేపు నిలవనివ్వలేదు. తనదైన శైలిలో ధనాధనా బాదేస్తూ స్కోరు బోర్డును పరుగులు పెట్టించాడు. అర్ష్‌దీప్‌ బౌలింగ్‌లో ఓ సిక్స్‌, హార్దిక్‌ ఓవర్లో వరుసగా రెండు సిక్స్‌లు దంచేశాడు. మరోవైపు కింగ్‌ కూడా చెలరేగడంతో విండీస్‌ ఏడు ఓవర్లలో 71/1తో బలమైన స్థితిలో నిలిచింది. ఆ తర్వాత కూడా ఇద్దరూ సాధికారిక బ్యాటింగ్‌ను కొనసాగించడంతో ఆతిథ్య జట్టు సాఫీగా లక్ష్యం దిశగా సాగింది. ప్రతికూల వాతావరణం కారణంగా 12.3 ఓవర్ల వద్ద ఆట నిలిచిపోయింది. అప్పటికి స్కోరు 117/1. 40 నిమిషాల విరామం తర్వాత ఆట తిరిగి ఆరంభమైంది. ఆ వెంటనే తిలక్‌ బౌలింగ్‌లో పూరన్‌ ఔటైనా విండీస్‌కు ఆందోళన చెందాల్సిన అవసరం లేకపోయింది. దూకుడు కొనసాగించిన కింగ్‌.. హోప్‌ (22 నాటౌట్‌)తో కలిసి విండీస్‌ను విజయతీరాలకు చేర్చాడు.
నిలిచిన సూర్య: అంతకుముందు టీమ్‌ఇండియాను వెస్టిండీస్‌ కట్టడి చేసింది. క్రమం తప్పకుండా వికెట్లు పడ్డా.. భారత్‌ గౌరవప్రద లక్ష్యాన్ని నిర్దేశించగలిగింది అంటే కారణం సూర్య కుమార్‌ కీలక ఇన్నింగ్సే. తిలక్‌ వర్మ (27; 18 బంతుల్లో 3×4, 2×6) మినహా మిగతా బ్యాటర్లంతా విఫలమయ్యారు. భారత్‌ టాస్‌ గెలిచి బ్యాటింగ్‌ ఎంచుకోగా.. గత మ్యాచ్‌ హీరోలు యశస్వి జైస్వాల్‌ (5), శుభ్‌మన్‌ గిల్‌ (9) భారీ అంచనాలతో బరిలోకి దిగారు. కానీ నిరాశపరిచారు. మూడు ఓవర్లలోపే ఓపెనర్లిద్దరూ పెవిలియన్‌ చేరిపోయారు. ఇద్దరినీ స్పిన్నర్‌ అకీల్‌ హోసీన్‌ వెనక్కి పంపాడు. తొలి ఓవర్లో జైస్వాల్‌ రిటర్న్‌ క్యాచ్‌ ఇచ్చి వెనుదిరగగా.. మూడో ఓవర్లో గిల్‌ వికెట్ల ముందు దొరికిపోయాడు. మూడు ఓవర్లలో 17కే రెండు వికెట్లు పడ్డా.. 6 ఓవర్లు ముగిసే సరికి భారత్‌ 51/2తో నిలిచింది. ఆత్మవిశ్వాసంతో ఆడిన సూర్య.. హోల్డర్‌ బౌలింగ్‌లో ఫోర్‌, హోసీన్‌ బౌలింగ్‌లో సిక్స్‌ దంచాడు. ఆకట్టుకునే ఆటను కొనసాగించిన తిలక్‌ మొదటి నుంచే ఎటాకింగ్‌ గేమ్‌ ఆడాడు. జోసెఫ్‌ బౌలింగ్‌లో ఏకంగా మూడు ఫోర్లు, సిక్స్‌ దంచేశాడు. మోకాలిని వంచి స్వీప్‌తో డీప్‌ స్క్వేర్‌ లెగ్‌లోకి సిక్స్‌ కొట్టిన తీరును చూసి తీరాల్సిందే. ఆ తర్వాత హోల్డర్‌ బౌలింగ్‌లో కూడా సిక్స్‌ కొట్టాడు. కానీ తిలక్‌ ఎక్కువసేపు నిలవలేకపోయాడు. మంచి ఊపుమీదున్న దశలో చేజ్‌కు రిటర్న్‌ క్యాచ్‌ ఇచ్చి వెనుదిరిగాడు. సంజు శాంసన్‌ (13) ఎక్కువసేపు నిలవలేదు. పేలవ ఫుట్‌వర్క్‌తో మరో అవకాశాన్ని వృథా చేసుకున్నాడు. హార్దిక్‌ పాండ్య (14; 18 బంతుల్లో 1×6) నిలిచినా క్రీజులో ఇబ్బందిగా కదిలాడు. ఎదుర్కొన్న తొలి 16 బంతుల్లో 7 పరుగులే చేయగలిగాడు. 11 నుంచి 16 ఓవర్ల మధ్య భారత్‌కు 37 పరుగులు మాత్రమే వచ్చాయి. ఈ ఓవర్లలో సూర్య కొట్టిన రెండు సిక్స్‌లు మినహా.. మరో బౌండరీ రాలేదు. 17వ ఓవర్లో హార్దిక్‌, ఆ తర్వాతి ఓవర్లో జట్టు స్కోరు 140 వద్ద సూర్య నిష్క్రమించడంతో ఇన్నింగ్స్‌కు భారత్‌ కోరుకున్నంత బలమైన ముగింపు ఇవ్వలేకపోయింది. మొత్తంగా చివరి నాలుగు ఓవర్లలో టీమ్‌ఇండియా అయిదు వికెట్లు చేజార్చుకుంది.

భారత్‌ ఇన్నింగ్స్‌: యశస్వి (సి) అండ్‌ (బి) అకీల్‌ 5; గిల్‌ ఎల్బీ (బి) అకీల్‌ 9; సూర్యకుమార్‌ ఎల్బీ (బి) హోల్డర్‌ 61; తిలక్‌ (సి) అండ్‌ (బి) చేజ్‌ 27; శాంసన్‌ (సి) పూరన్‌ (బి) షెఫర్డ్‌ 13; హార్దిక్‌ (సి) హోల్డర్‌ (బి) షెఫర్డ్‌ 14; అక్షర్‌ (సి) షెఫర్డ్‌ (బి) హోల్డర్‌ 13; అర్ష్‌దీప్‌ (బి) షెఫర్డ్‌ 8; కుల్‌దీప్‌ ఎల్బీ (బి) షెఫర్డ్‌ 0; చాహల్‌ నాటౌట్‌ 0; ముకేశ్‌ నాటౌట్‌ 4; ఎక్స్‌ట్రాలు 11 మొత్తం: (20 ఓవర్లలో 9 వికెట్లకు) 165; వికెట్ల పతనం: 1-6, 2-17, 3-66, 4-87, 5-130, 6-140, 7-149, 8-149, 9-161; బౌలింగ్‌: అకీల్‌ 4-0-24-2; మేయర్స్‌ 1-0-4-0; హోల్డర్‌ 4-0-36-2; జోసెఫ్‌ 3-0-41-0; చేజ్‌ 4-0-25-1; షెఫర్డ్‌ 4-0-31-4
వెస్టిండీస్‌ ఇన్నింగ్స్‌: కింగ్‌ నాటౌట్‌ 85; మేయర్స్‌ (సి) యశస్వి (బి) అర్ష్‌దీప్‌ 10; పూరన్‌ (సి) హార్దిక్‌ (బి) తిలక్‌ 47; హోప్‌ నాటౌట్‌ 22; ఎక్స్‌ట్రాలు 7 మొత్తం: (18 ఓవర్లలో 2 వికెట్లకు) 171; వికెట్ల పతనం: 1-12, 2-119; బౌలింగ్‌: హార్దిక్‌ 3-0-32-0; అర్ష్‌దీప్‌ 2-0-20-1; కుల్‌దీప్‌ 4-0-18-0; చాహల్‌ 4-0-51-0; ముకేశ్‌ 1-0-10-0; తిలక్‌ 2-0-17-1; అక్షర్‌ 1-0-8-0; యశస్వి 1-0-11-0