సౌదీలో తొలి స్కై స్టేడియం

దుబాయ్‌: స్టేడియం అంటే నేల మీద ఉంటుంది.. కానీ సౌదీ అరేబియా ఆకాశంలో కట్టబోతోంది. 2034 ఫుట్‌బాల్‌ ప్రపంచకప్‌ మ్యాచ్‌లకు ఆతిథ్యం ఇవ్వడానికి సౌదీ ఈ సరికొత్త ఆలోచన చేసింది. ఇది భూమి నుంచి 350 మీటర్ల ఎత్తులో ఉండబోతోంది. ఈ స్టేడియంలో 46 వేల మంది అభిమానులు కూర్చునే అవకాశం ఉంటుంది. రూ.8,800 కోట్ల భారీ వ్యయంతో ఈ స్టేడియం కట్టాలనేది సౌదీ ప్రణాళిక. 2032 నాటికి ఈ స్టేడియం పూర్తి చేయాలని భావిస్తోంది. ఈ ప్రయత్నం ఫలిస్తే ప్రపంచంలో ఇదే తొలి స్కై స్టేడియంగా నిలవనుంది. 48 జట్లు పోటీపడే 2034 ప్రపంచకప్‌నకు సౌదీలోని అయిదు నగరాలు ఆతిథ్యం ఇవ్వనున్నాయి. ఈ స్టేడియానికి సంబంధించిన ఊహాచిత్రాలు అంతర్జాలంలో చక్కర్లు కొడుతున్నాయి.